Këtë të enjte, 28 maj, nis zyrtarisht fushata zgjedhore për zgjedhjet e parakohshme parlamentare të 7 qershorit 2026 në Kosovë dhe do të zgjasë deri në hyrjen në fuqi të heshtjes zgjedhore, një ditë para votimit.
Sipas të dhënave zyrtare të KQZ-së, të drejtë vote në këto zgjedhje kanë 2,092,174 qytetarë. Prej tyre, 1,959,962 votues do të votojnë brenda Kosovës, ndërsa 132,212 qytetarë janë regjistruar për votim nga diaspora, përmes postës ose përfaqësive diplomatike.
Nga votuesit jashtë vendit, 100,970 do të votojnë përmes postës, 3,518 përmes kutisë postare në Kosovë, ndërsa 27,724 do të votojnë fizikisht në përfaqësitë diplomatike.
Në garën për 120 ulëset e Kuvendit të Kosovës marrin pjesë 23 subjekte politike me gjithsej 917 kandidatë. Sipas KQZ-së, në listat zgjedhore janë të përfshirë 603 burra dhe 314 gra.
Kosova kaloi në zgjedhje të parakohshme, pasi vendi hyri në krizë të re politike dhe institucionale, duke mos gjetur dakordësinë për zgjedhjen e presidentit të ri të vendit pas përfundimit të mandatit të Vjosa Osmanit.
Përtej diskutimeve mes partive, palët nuk arritën të gjenin konsensus për një emër të përbashkët për presidentin.
