Pas arritjes së marrëveshjes, koalicioni ‘PANA’ (PDK, AAK, NISMA dhe AKR) ka kërkuar që ditën e enjte të zhvillohet seanca për zgjedhjen e kryetarit të Kuvendit. Lajmin e ka konfirmuar Milaim Zeka, deputet i Kuvendit nga radhët e Nismës për Kosovën.
“Nesër ora 10.00, seanca e Parlamentit”, ka shkruar Zeka në Facebook. Ndërsa mbrëmjen e sotme është arritur marrëveshja edhe me Listën Serbe. AKR ka hequr dorë nga drejtimi i Ministrisë së Bujqësisë, e cila do t’i takojë Listës Serbe.
Pas disa orë negociatash lideri i AKR-së është bindur të heqë dorë nga Ministria e Bujqësisë, shkruan Telegrafi. Me votimin e kryetarit të Kuvendit, që sipas të gjitha gjasave do të jetë Kadri Veseli, i hapet rruga formimit të qeverisë nga Haradinaj.
