Edhe kjo duhej. Nëse nuk importohet nga Kina, kafshët nuk do t’ia dinin lezetin ushqimit. Për gati dhjetë muaj janë importuar në Kosovë mbi 33 mijë kilogram tagji ushqim për kafshëve qe në vlerë monetare e kapin shifrën 36 mijë euro.
Pak më shumë se 2.4 milion kilogramë produkte ushqimore janë importuar nga Kina brenda periudhës 1 Janar -19 tetor 2015. Vlera monetare e tyre është 3.8 milion euro. Kështu tregojnë Statistikat e Doganës së Kosovës dërguar gazetës “Zëri” lidhur me produktet ushqimore të importuara nga Kina.
“Janë importuar 434 mijë kilogramë kafe, çaj dhe erëza me vlerë monetare 724 mijë euro. Ndërsa, janë importuar 443 mijë kilogram farat vajore dhe frutat me përmbajtje vajore; kokrra, fara dhe fruta te ndryshme; bimët industriale apo medicinale; kashta dhe tagjia që kapin vlerën 869 mijë euro.
Po ashtu, janë importuar 7236 kilogramë peshku dhe kafshët guackore te nnujshme, molusqet dhe kafshët e tjera jovertebrore ujore në vlerë prej 14 mijë eurove”, thuhet në statistikat e Doganës për periudhën dhjetë mujore.
