Viti që po e lëmë pas konsiderohet si një prej viteve më të dështuara për sa i përket, së paku, diplomacisë kosovare. Kjo për faktin se, përveçse që dështoi ta anëtarësonte Kosovën në UNESCO, nuk ka arritur që të merr më shumë se një njohje për mëvetësinë.
James Ker-Lindsay, hulumtues i çështjeve politike për Evropën juglindore në Shkollën Londineze të Shkencave Politike dhe Ekonomisë, përmes Twitter-it, ka bërë me dije se Kosovën në vitin 2015 e ka njohur vetëm një vend, dhe ai është Antigua & Barbuda, njohje që i erdhi Kosovës në muajin maj.
“Vetëm një vend e ka njohur Kosovën më 2015. Antigua & Barbuda në muajin maj. Totali më i ulët vjetor që nga shpallja e pavarësisë më 2008”, ka thënë Lindsay, raporton Koha.net. Viti më produktiv i diplomacisë kosovare për sa i përket njohjeve ndërkombëtare të shtetësisë ka qenë pikërisht viti i shpalljes së pavarësisë, 2008-a me gjithsejtë 53 njohje, pastaj janë vitet 2011 dhe 2012 me nga 12 njohje.
Viti 2009 i solli Kosovës gjithsejtë 11 njohje ndërkombëtare, për dallim nga viti pasues, 2010 me 8 njohje sa erdhën edhe më 2013. Kurse në vitin 2014, Kosova u njoh ndërkombëtarisht nga vetëm 4 shtete.
