Më shumë se 50 mijë qytetarë deri më tash kanë rënë viktimë e avikompanive mashtruese të cilat kryesisht operojnë në Gjermani e Zvicër. Këto (kompanitë) përmes call centrave ilegal që operojnë në Kosovë përmes mesazheve dhe thirrjeve telefonike I kanë joshur bashkatdhetarët tanë duke iu ofruar bileta me çmimeve tejet të ulëta, por pjesa dërmuese e tyre kanë ardhur në Kosovë, por më pas është dashur të blejnë edhe një herë aviobiletën në kompani tjetër.
Erdhën nga shtete të ndryshme të Evropës të gëzuar për të festuar ndërrimin e viteve së bashku më familjaret e tyre në vendlindje, por një numër jo i vogël i tyre u kthyen të hidhëruar, pasi që kompani ku ata kishim blerë aviobiletat kthyese, nuk i ktheu në destinacionet prej nga ata kanë ardhur.
Të dielën qindra gra, pleq, fëmijë, por edhe të rinj kanë pritur deri në 14 orë për të fluturuar drejt Baselit, por një pjesë jo e vogël e tyre nuk kanë mundur të realizojnë këtë, pasi që për ta nuk kishte vend në avion. E për ata që kanë kushte më të mirë ekonomike nuk ka paraqit edhe shumë problem, pasi që një numër jo i vogël i tyre kanë blere edhe një here biletat me çmime gati dyfish më të larta për tu kthyer në shtetet ku ata jetojnë e punojnë.
Mesi i vitit (qershor, korrik, gusht) dhe muaji dhjetor janë shndërruar në muajt e “artë” për kompani mashtruese mbrapa të cilave fshihen qytetare nga Kosova, por edhe shteteve të ndryshme Evropiane.
Të joshur nga mesazhe telefonik më oferta me çmime qesharake, të cilat kryesisht dërgohen nga Call Centrat ilegal që operojnë në vendin tonë, dhjetëra mijëra bashkatdhetarë janë rënë viktime e këtyre kompanive mashtruese. Këta kanë paguar kompanive parat për aviobileta kthyese, por një numër i madh i tyre më nuk kanë mundur të kthehen me biletën e njëjtë.
“Një fjalë e urtë thotë çorba e lirë t’i djeg buzët. Kështu na ndodhi edhe neve. Bileta e lirë na la në Kosovë. Ky është mjerim. Kjo ndodh vetëm në vendin tonë”tha të dielën i dëshpëruar një plak rreth të shtatëdhjetave, deri sa me bashkëshorten e tij po priste për të fluturuar drejt Baselit.
“U mashtruam nga mesazhet e shumtë që ata na dërguan neve përmes telefonit. Unë edhe më tutje nuk e di se ku ata e morën numrin tim telefonik”tha më tej i dëshpëruar plaku.
Njëjtë si ky kishte edhe shumë qytetarë tjerë të cilët ishin lodhur nga pritjet e shumta. Në disa raste ata mllefin e shfaqeshin te punëtoret e Aeroportit.
“Si ka mundësi që Aeroporti ta lejoj një kompani mashtruese të fluturoj. Kjo është skandaloze” i bërtisë një burrë një punëtoreje të aeroportit, e cila me një ton të ulë u mundohej ta shfajësonte vetën.
Për një qartë situata u tensionua edhe më shumë, ku dhe u shfaq një grup policësh të cilët në qetësi u mundoheshin ti qetësojnë qytetaret e lodhur e të rraskapitur.
“Iu hajeni hapeni rastin në polici, ne më pastaj do ta hetojmë rastin” i thoshte polici një burri të nervozuar nga lodhja e madhe.
Zharku: Mashtrimet po ndodhin jashtë Kosovës
Ministri Infrastrukturës Lutfi Zharku thotë se qytetaret e Kosovës po mashtrohen nga aviokompani që janë të regjistruara në shtete të ndryshme të Evropës, por jo në Kosovë.
“Deri më tash pjesa dërmuese e mashtrimeve kanë ndodhur nga kompani që operojnë në Gjermani, Zvicër, por edhe në shtete tjera. Në këto shtete s’kemi çka të bëjmë. Gjatë verës Institucionet patën marrë masa ndaj një kompanie e cila ka mashtruar udhëtaret e që ka pasur përfaqësinë në Kosovë”tha ministri Zharku për gazetën “Zëri”.
