Përfaqësuesja e Kosovës ka planifikuar që ndeshjen miqësore ndaj Letonisë (28 mars) dhe Turqisë (qershor 2018) t’i luajë në Gjermani, përkatësisht në stadiumin e Kolnit. Por, ky plan ka dështuar. Kosova nuk ka mundur ta luajë asnjë ndeshje të eliminatoreve për Botërorin “Rusia 2018’ në Prishtinë e Mitrovicë, pasi stadiumet e këtyre dy qyteteve nuk i plotësojnë kriteret e FIFA-s dhe UEFA-s.
Kështu, ekipi i Albert Bunjakit deri më tani ndeshjet si vendas i ka luajtur në stadiumin e Shkodrës “Loro Boriçi”.
Por, sipas Kölner Stadt-Anzeiger, Federata e Futbollit të Kosovës ka planifikuar që ndeshjen miqësore ndaj Letonisë (28 mars) dhe Turqisë (qershor 2018) t’i luajë stadiumin e Kolnit.
“Federata e Futbollit të Kosovës na ka kontaktuar”, konfirmoi drejtori sportiv i skuadrës së Kolnit, Lutz Wingerath. Megjithatë, ai sqaroi se para se të vazhdonin negociatat, duheshin siguruar leje të tjera.
Por sipas Kölner Stadt-Anzeiger, plani i FFK-së këtu ka dështuar, pasi si policia gjermane, ashtu edhe Federata, kanë qenë kundër organizimit të kësaj ndeshjeje në territorin gjerman, përcjell Express.
“Sipas mendimit tonë, dy ndeshjet nuk duhet të zhvillohen në Këln”, u shpreh Jan Schabacker nga Drejtoria Qendrore e Policisë (LZPD) në Duisburg.
Sipas Schabacker problemet me sigurinë dhe përplasje fizike janë mese të mundshme. LZPD këtë mendim ia ka përçuar edhe Federatës Gjermane të Futbollit.
“Na u bënë kërkesat, por ne i refuzuam”, konfirmoi një zëdhënës i Federatës Gjermane. Sipas Federatës, miqësoret e vendeve të treta në stadiumet gjermane do të lejohen vetëm në vitet kur ka aktivitete madhore, por siç dihet, në vitin 2017 nuk ka të tillë, citohet ”Express”. (b.an)
