Kosova është bërë shkas për kundërthënien e parë të madhe të zv/kancelarit austriak, Heinz-Christian Strache që udhëheq me partinë e ekstremit të djathtë, FPO.Në fundjavë gazeta e vjetër e Beogradit, Politika e citoi Strachen të ketë thënë se Kosova është pjesë e Serbisë.
E marrë si e mirëqenë deklarata u duartrokit në Serbi, por hasi në kundërshtim të fortë në Austri e Kosovë.Nuk vonoi shumë dhe Zyra e njeriut të dytë të Qeverisë austriake e demantoi gazetën serbe, duke mohuar që Strache ta ketë quajtur Kosovën pjesë të Serbisë.
Të hënën politikani austriak zbarkoi në Beograd, ku u takua me ministrin e Jashtëm serb, Ivica Daçiq.Aty ai ka paraqitur mirëkuptim për Serbinë, por tha se e ka të qartë që Austria e ka njohur Kosovën dhe se ky është fakt, por se statusi final nuk është zgjidhur ende dhe se do të ishte mirë që Kosova dhe Serbia të gjenin një zgjidhje të përbashkët, të pranueshme për të dyja palët.
Gazeta Politika ka mbetur prapa shkrimit të saj, e zëdhënësi i zv/kancelarit ka thënë se ajo çfarë ai është munduar të thotë është se nga perspektiva serbe Kosova vazhdon të mbetet pjesë e Serbisë.Skena politike austriake në secilin rast e ka kundërshtuar deklaratën, duke thënë se ky shtet është përkrahës i madh i Kosovës së pavarur.
Jörg Leichtfried, pjesë e kabinetit të njëjtë qeveritar, por nga partia SPO e ka akuzuar Strachen se po i vë benzinë flakës në konfliktin ndërmjet Kosovës dhe Serbisë dhe po e nënvlerëson konsensusin evropian për Kosovën.
Ministrja e Jashtme, Karin Kneissel e nominuar nga partia e Straches, tha se njohja e pavarësisë së Kosovës nga Austria është e pakthyeshme.
Othmar Karas, deputet austriak në Parlamentin Evropian, ka thënë se deklarata e zv/kancelarit është sulm për paqen në Ballkanin Perëndimor.
Strache është lideri i partisë së ekstremit të djathtë, FPO që iu bashkua koalicionit qeveritar me kancelarin Sebastian Kurz që është një përkrahës i madh i pavarësisë së Kosovës, përgatiti Koha. (b.an)
