Procesi i numërimit të votave në Mitrovicën e Jugut ka përfunduar sot, pasi Komisioni Qendror i Zgjedhjeve (KQZ) ka konfirmuar përfundimin e numërimit të të gjitha 105 vendvotimeve. Kjo ishte e vetmja komunë ku vijonte numërimi i votave në Kosovë, pasi në të gjitha komunat e tjera, procesi kishte përfunduar para mesnate.
Sipas rezultateve zyrtare, kandidati i Lëvizjes Vetëvendosje, Faton Peci, ka fituar zgjedhjet me 53.47% të votave, ose 17 mijë e 837 vota. Ndërsa kandidati i Partisë Demokratike të Kosovës (PDK), Arian Tahiri, ka marrë 46.53% të votave, ose 15 mijë e 522 vota.
Dy vendvotime kishin mbetur të panumëruara gjatë natës së kaluar, por numërimi u mbyll sot pa incidente dhe pa pretendime për manipulime siç raporton Klan Kosova.
Zyrtarët e KQZ-së raportuan se procesi ishte i shpejtë dhe i qetë, me shpalljen e rezultateve vetëm dy orë pas mbylljes së qendrave të votimit.
Ky proces tregon një kontrast të dukshëm me zgjedhjet e zhvilluara njëkohësisht në Shqipëri, ku numërimi i votave në pesë bashki të pjesshme, përfshirë Tepelenën, Vlorën, Beratin, Cërrikun dhe Matin, u vonua më shumë.
Pra, Kosova ia përsëriti leksionin e proceseve zgjedhore Shqipërisë. Qendrat e votimit u mbyllën në orën 19:00 dhe në orën 21:30, Komisioni Qendror i Zgjedhjeve shpalli rezultatet. Çdo parti e mori vesh në 2 orë fatin e vet. Kush fitoi, festoi dhe kush humbi, pranoi rezultatin. Procesi ishte i shpejtë dhe asnjë parti nuk pati pretendime për manipulime.
Mbrëmjen e kaluar, kur në Prishtinë u shpall rezultati, në Tiranë KQZ njoftoi se sapo kishte nisur numërimi i kutisë së parë në bashkinë e Tepelenës, një nga pesë njësitë ku u zhvilluan zgjedhjet e pjesshme dhe ku votimi u mbyll në orën 18:00, ashtu si në Vlorë, Berat, Cërrik e Mat.
Në Kosovë, votat numërohen në qendrat e votimit. Ndërsa në Shqipëri, kutitë e votimit mblidhen nga çdo qendër votimi dhe transportohen drejt qendrave të numërimit, ku numërohen manualisht nga komisionerët, shpesh në kushte tensioni politik, në ambiente të mbushura me përfaqësues partish e vëzhgues të shumtë.
