Delegacioni i Kosovës dhe ai i Serbisë, në bisedimet teknike në Bruksel, kanë përafruar qëndrimet për çështjen e Telekomit, por nuk kanë arritur ta finalizojnë atë. Dy palët shprehen optimistë se Kosova shumë shpejt do ta marrë kodin telefonik 383, ndërsa serbët e Kosovës të kenë një operator të ri të telefonisë me fushëveprim të kufizuar. Kjo është bërë e ditur nga kryetarja e delegacionit të Kosovës në bisedime, ministrja Edita Tahiri.
Ajo sqaron se në takimin e fundit në Bruksel, të martën, palët kanë shënuar përparim në përafrimin e qëndrimeve në çështjet që kanë të bëjnë me planin e veprimit, ku parashihen obligimet dhe afatet.
“Jemi pajtuar që të përshpejtohet ky proces, duke precizuar afatet kohore për obligimet që i ka secila palë nga ky proces”, tha Tahiri, duke mos dhënë detaje rreth këtyre afateve.
Ndërkohë, ajo shprehet optimiste se Kosova do ta marrë kodin telefonik ndërkombëtar 383 nga ITU-ja dhe kërkesën në emër të Kosovës do ta bëjë shteti i Austrisë.
