Kosova rrezikon të humbë rreth 500 milionë euro nga pretendimet e kompanive që kanë ushtruar padi në gjykata ndërkombëtare, shkruan Koha Ditore. Nga tri padi, dy veçse janë humbur dhe vlera e dëmit është dhjetëra milionëshe.
Të martën u konfirmua vendimi i Tribunalit Ndërkombëtar të Arbitrazhit, sipas të cilit Telekomi i Kosovës-Vala duhet t`i paguajë rreth 30 milionë euro “Devolli Group”. Ky vendim erdhi pasi kompania “Z-mobile” kishte ushtruar padi me akuzën se është shkelur kontrata dhe nuk i janë ofruar shërbimet e kërkuara sipas kontratës.
Kurse para disa muajsh Ministria e Punëve të Brendshme ka humbur rastin me kompaninë austriake për tenderin e pasaportave, ku shuma financiare që duhet t’i paguajë asaj është 5 milionë e 300 mijë euro. Edhe pse MPB-ja ka ushtruar ankesë ndaj këtij vendimi në Gjykatën Ekonomike në Prishtinë, ajo është refuzuar. (b.an)
