Demarkacioni i kufirit me Malin e Zi nuk është duke u bazuar në hartat e vitit 1974, por në harta të mëvonshme, të cilat janë paraqitur nga pala malazeze dhe kështu vija kufitare po lëviz deri në 7 apo 8 kilometra në brendi të territorit të Kosovës, duke bërë që Kosova t’i humbë rreth 12 mijë hektarë.
Kështu kanë thënë për “Zërin” njohës të këtij procesi, të cilët po kërkojnë nga Qeveria e Kosovës që ta ndërpresë procedurën e vijëzimit të kufirit dhe ta shkarkojë nga detyra Komisionin për Demarkacion për shkak të mostransparencës.
Ata më tej kanë thënë se pavarësisht asaj që thotë Komisioni Shtetëror për Shënjimin dhe Mirëmbajtjen e Kufirit Shtetëror të Republikës së Kosovës, qytetarët e asaj zone e dinë mirë se ku është kufiri dhe se nuk do të pranojnë të humbasin tokat, të cilat i kanë trashëguar me shekuj.
