Kuvendi i Kosovës miratoi rezolutën për unifikimin doganor me Shqipërinë. Rezoluta e paraqitur nga deputeti socialdemokrat Visar Ymeri mori mbështetjen e 67 deputetëve përfshirë edhe të atyre të shumicës qeverisëse. Vetëm 1 deputet votoi kundër dhe një tjetër abstenoi.
Në të njëjtën seancë u miratua edhe heqja e tarifave Roaming, në komunikimet telefonike mes dy vendeve.
Unifikimi doganor mes Shqipërisë dhe Kosovës heq barrierat kufitare mes dy vendeve, çka lehtëson dhe nxit rritjen e lëvizjes së njerëzve dhe mallrave në të dyja anët e kufirit. Marrëveshja lehtëson importin dhe eksportin e produkteve kosovare përmes porteve shqiptare.
Kornizat e projektit u diskutuan mes kryeministrave Rama e Haradinaj në mbledhjen e përbashkët të dy qeverive që u zhvillua më 27 Nëntor në Korçë.
Në parlamentin e Shqipërisë nuk ka kaluar ende një rezolutë e tillë për të bërë realitet deklarimet e kryeministrit Rama dhe homologëve të tij kosovar, të cilat janë angazhuar për këtë çështje në të gjitha mbledhjet e përbashkëta të dy qeverive.
Aktualisht, niveli tregtar mes Kosovës dhe Shqipërisë është në stadin e Zonës së Tregtisë së Lirë dhe dallimi i këtij stadi me nivelin e Unifikimit Doganor, është se në të parën ndodh reduktimi me shkallë i detyrimeve doganore dhe heqja e barrierave tarifore mes shteteve përkatëse.
Në rastin e Unifikimit Doganor, ka edhe tregti të lirë mes shteteve anëtare, ashtu edhe detyrime doganore të unifikuara mbi mallrat e vendeve që nuk janë të përfshira në Unifikimin Doganor.
a.ç
