Kishte gënjyer nëpërmjet rrjetit social Facebook se ka dalë pozitiv me COVID-19. Ky qytetar nga Prishtina, menjëherë është identifikuar dhe është arrestuar nga policia e Kosovës dhe me urdhër të prokurorit është dërguar në mbajtje.
Ndërsa 26 persona janë ndaluar nga policia 24 orët e fundit për mosveprim të dispozitave shëndetësore gjatë epidemisë. Disa prej tyre janë dërguar në mbajtje.
33 pacientë të infektuar me koronavirus aktualisht janë duke u trajtuar në Klinikën Infektive në QKUK, ndërsa të tjerët në shtëpi. Sipas mjekëve 7 prej pacientëve të shtrirë në spital kanë nevojë për oksigjenoterapi ndërsa dy prej tyre janë në gjendje më të rëndë.
Ndërkohë qeveria në detyrë ka ndryshuar orarin e ndalimit të qarkullimit të qytetarëve dhe automjeteve private, gjatë kohës së përballjes me pandeminë e koronavirusit.
Sipas vendimit të ri të qeverisë, ndalimi vlen nga ora 17:00 deri në orën 06:00 të mëngjesit.
Këtë vendim të ri e kanë mirëpritur qytetarët e Prishtinës.
Fillimisht, ishte vendosur që lëvizja të kufizohet nga ora 10:00 deri në 16:00 dhe nga 20:00 deri në 6:00, por më pas kjo shfaqi pakënaqësi pasi u panë grumbullime të shumta të qytetarëve, kryesisht në dyqane.
Ndërsa farmacitë e licencuara do të ushtrojnë veprimtaritë e tyre nga ora 6 e mëngjesit deri në orën 17.00. Pas kësaj kohe veprimtaria e tyre do të organizohet përmes kujdestarisë.
