Përgatitjet për zgjedhjet e jashtëzakonshme parlamentare që mbahen të dielën në Kosovë janë drejt përfundimit. KQZ ka certifikuar 1180 kandidatë për deputetë, ndërsa në garë janë 22 subjekte politike, 18 prej tyre janë parti politike, 3 koalicione, 2 iniciativa qytetare dhe një kandidat i pavarur.
Partitë kryesore politike po përmbyllin fushatat gjatë së cilave kanë prezantuar programet e tyre qeverisëse, ku si pika kyçe kanë vendosur ekonominë dhe punësimin. Koalicioni i drejtuar nga Lëvizja Vetëvendosje ka bërë fushatë mbi politikat ekonomike dhe sociale. Premtimet e saj përfshijnë rritje të pagave, subvencione shtetërore, mbështetje për pensionistët dhe studentët, si dhe masa për të frenuar rritjen e çmimeve. Kandidati i saj për kryeministër, Albin Kurti, ka publikuar edhe një listë të të ashtuquajturave vendime të para nëse fiton, të cilat përfshijnë një buxhet më të madh shtetëror, subvencione për energjinë elektrike dhe mbështetje për sektorin privat.
Partia Demokratike e Kosovës me kandidatin për kryeministër Bedri Hamza ka theksuar se dialogu me Serbinë dhe ruajtja e sovranitetit të Kosovës janë thelbësore për qasjen e saj politike. Partia e dytë më e madhe ka folur për zhvillimin ekonomik dhe mirëqenien sociale si shtylla të vizionit të saj qeverisës.
Edhe Lidhja Demokratike e Kosovës e ka përfshirë dialogun me Serbinë në platformën e saj qeverisëse. Fushata e kandidatit të LDK-së për kryeministër Lumir Abdixhiku është përqendruar tek punësimi. Ndërsa Aleanca për Ardhmërinë e Kosovës e Ramush Haradinajt e ka vënë theksin tek siguria shtetërore, dialogu me Serbinë dhe zhvillimi ekonomik si pika kyçe të programit të saj. Sipas KQZ-së të drejtë vote më 28 dhjetor kanë 2 milionë e 76 mijë e 290 qytetarë.
Procesi zgjedhor brenda vendit do të zhvillohet në 948 qendra të votimit, me 2614 vendvotime. Qendra votimi do të ketë edhe jashtë Kosovës, ku votimi fizik organizohet në 16 ambasada dhe 13 konsullata në disa shtete të botës, ndërsa nga diaspora janë regjistruar për të votuar me postë rreth 76 mijë persona. Zgjedhjet e së dielës janë kyçe për të ardhmen e vendit, i cili kaloi rreth një vit në ngërç politik dhe pa institucione funksionale.
