Shqipëria po ballafaqohet me një situatë emergjente për shkak të shirave të pandërprera dhe sipas parashikimeve të tyre situata sa vjen e përkeqësohet nga vërshimet. Përmes një deklarate për shtyp bëhet e ditur se Kosova ka vendosur t’i ofrojë ndihmë përmes ekipeve të shpëtimit, transmeton Koha.net.
“Drejtoria e Emergjencave Civile të Republikës së Shqipërisë ka kërkuar ndihmë nga Agjencia e Menaxhimit Emergjent/Ministria e Punëve të Brendshme, për mbështetje në operacionet e shpëtimit me pesë (5) ekipe të shpëtimit dhe tre (3) ekspert për vlerësimin e situatës.
Drejtori i Përgjithshëm i AME-së me miratimin paraprak të Ministrit të Punëve të Brendshme, Flamur Sefaj ka vendosur që sot, më 2 dhjetor nga ora 06:00 ekipet në fjalë të nisen për në destinacion”, thuhet në komunikatë.
Më tutje thuhet se ekipet janë të përbëra prej 34 pjesëtarëve të përzgjedhur nga Njësitë Profesionale të Zjarrfikjes dhe Shpëtimit, të pajisur me mjetet përkatëse për zhvillimin e operacioneve të shpëtimit në ujëra sipërfaqësorë dhe kjo natyrisht pa e dëmtuar kapacitetin tonë reagues brenda Kosovës. (b.an)
