Përfaqësuesja e Kosovës nuk do të marrë pjesë në Kampionatin Evropian “Franca 2016”, i cili nis pas pak javësh. Mirëpo, anëtarja e re e UEFA-s dhe FIFA-s, në mënyrë indirekte, do të përfaqësohet në “Euro 2016” përmes një “kolonie” të futbollistëve që kanë lindur apo kanë rrënjë nga Kosova, e të cilët do t’i përfaqësojnë shtetet tjera në ngjarjen më të madhe të futbollit evropian, shkruan Zëri.
Gati 20 futbollistë kosovarë pritet të garojnë në “Euro 2016”, në bazë të listave preliminare që i kanë zbuluar përzgjedhësit e shteteve tjera pjesëmarrëse.
Në listën preliminare që e ka zbuluar Gianni De Biasi i Shqipërisë figurojnë emrat e katërmbëdhjetë futbollistëve nga Kosova. Ata janë: Lorik Cana, Etrit Berisha, Arlind Ajeti, Mërgim Mavraj, Frederik Veseli, Migjen Basha, Taulant Xhaka, Burim Kukeli, Ermir Lenjani, Herolind Shala, Amir Abrashi, Shkëlzen Gashi, e po ashtu Amir Rrahmani e Milot Rashica, të cilët kanë më pak gjasa për të shkuar në Evropian, por janë prezentë në listën preliminare të De Biasit.
Nëse në këtë grup të futbollistëve përfshihet edhe emri i Berat Gjimshitit me prejardhje nga Kosova Lindore, atëherë numri shkon në 15.
Por, këta nuk janë kosovarët e vetëm. Në “Euro 2016” pritet të shkojnë edhe Valon Behrami, Xherdan Shaqiri, Granit Xhaka e Shani Tarashaj, të gjithë këta nga Kosova, e që janë përfshirë në listën e përzgjedhësit të Zvicrës, Vladimir Petkoviç.
Shqiptarët me më së shumti futbollistë në “Euro 2016”
Kombi shqiptar do të përfaqësohet në “Euro 2016” me më shumë futbollistë sesa çdo komb tjetër evropian. Secila skuadër pjesëmarrëse në Kampionatin Evropian do të shkojë me nga 23 futbollistë.
Disa nga to kanë lojtarë edhe të natyralizuar. Kurse, shqiptarët do t’i kenë në Francë 30 futbollistë, pra më shumë sesa çdo komb tjetër, raporton Zëri.
Përpos 23 futbollistëve të Shqipërisë, e cila për herë të parë do të garojë në një Kampionat Evropian, edhe Zvicra pritet t’i marrë me veti gjashtë futbollistë kosovarë.
Në listën preliminare të Vladimir Petkoviçit, e cila vështirë se do të ndryshojë nga ajo finale, përpos Behramit, Shaqirit, Xhakës e Tarashajt, figurojnë edhe emrat e dy futbollistëve tjerë shqiptarë me prejardhje nga Maqedonia, Blerim Xhemailit dhe Admir Mehmedit.
Por, është lënë jashtë Pajtim Kasami. Ndërkohë, në listën e kampiones aktuale botërore, Gjermanisë, figuron emri i mbrojtësit shqiptar, po ashtu nga Maqedonia, Shkodran Mustafi.
Në listat preliminare të shteteve tjera pjesëmarrëse në Kampionatin Evropian figurojnë emrat e gati 20 futbollistëve me origjinë nga Kosova, përcjell Zëri.
Te Shqipëria janë: Lorik Cana, Etrit Berisha, Arlind Ajeti, Mërgim Mavraj, Frederik Veseli, Migjen Basha, Taulant Xhaka, Burim Kukeli, Ermir Lenjani, Herolind Shala, Amir Abrashi, Shkëlzen Gashi, Amir Rrahmani e Milot Rashica. Në listën preliminare të Zvicrës janë: Valon Behrami, Granit Xhaka, Xherdan Shaqiri, Shani Tarashaj.
