Në emisionin e djeshëm “Tonight Ilva Tare”, kandidati i PD-së për Bashkinë e Tiranës, Halim Kosova, foli për herë të parë për financuesit e fushatës së tij, duke deklaruar se nuk e dinte se kush ishin ata. Madje, ai u distancua nga Partia Demokratike, duke u “shitur” në përgjigjet e tij si kandidat i pavarur, të tipit: ‘Unë jam Halim Kosova, s’di gjë ç’bën PD’. Ai shtoi se ka një këshilltar të huaj, me të cilin flet do ditë, po as këtë nuk ka dijeni se kush e financon.
“Unë di që në fushatë partitë marrin një financë. Sinqerisht, me më pyet, unë nuk e di se sa është. Unë nuk pyes fare se sa bën ky flamur apo banderolë. Partia le të përgjigjet për financat, kur ta fus unë dorën në xhep do të them. Nuk janë ofruar donatorë. Gjëra shumë të vogla si benzinë, gjëra të vogla që i mbuloj edhe vetë”, deklaroi Kosova.
Ndërsa, për këshilltarin e huaj tha: “Çdo instruktor dhe këshilltar i huaj është i vlefshme në këtë fushatë sepse çdo lloj eksperience vlen. Unë kam një këshilltar të huaj. Nuk kam dijeni se kush e financon. Kam një njeri që bisedoj. Jo vetëm këtu, por kam edhe jashtë. Më kanë shkruar në Facebook më thonë: Halim na merr në telefon dhe ne jemi gatshëm me të ndihmuar. Nuk është se duhet ta kesh patjetër përballë, ke skype, ke telefonin”.
