Prej një muaji Kosova ka hequr masat e reciprocitet të vendosura ndaj shtetit serb sa i përket njohjes së certifikatave të transportit të lëndëve të rrezikshme ADR.
Ministrja për Dialog, Edita Tahiri, ka bërë të ditur se nga e hëna ka hyrë në fuqi Marrëveshja për njohjen reciproke të certifikatave ADR midis dy shteteve, Kosovës dhe Serbisë, të ndërmjetësuar nga Bashkimi Evropian.
Sipas saj, kjo Marrëveshje mundëson lirinë e lëvizjes së mallrave të rrezikshme mes dy shteteve sipas Konventës së ADR-së, ku të gjithë transportuesit nga Kosova përmes certifikatave të ADR-së, të lëshuara nga institucionet përkatëse të Republikës së Kosovës, do ta realizojnë këtë veprimtari tregtare me shtetin fqinj, Serbinë.
Por, me hyrjen në fuqi të kësaj Marrëveshjeje janë hequr edhe masat e reciprocitetit të vendosura nga Qeveria e Republikës së Kosovës, përkatësisht nga Ministria e Tregtisë dhe Industrisë.
Adriatik Stavileci, zëdhënës në Doganën e Kosovës, ka konfirmuar se në orët e paradites katër kamionë me ADR të Serbisë kanë hyrë në Kosovë.
Mirëpo, ai ka bërë të ditur se deri në orët e pasdites asnjë kamion me ADR të Republikës së Kosovës nuk ka kaluar ne territorin e Serbisë.