Kandidati i Partisë Demokratike, Halim Kosova, deklaroi dje në emisionin “Opinion” se, pavarësisht se nuk dalin së bashku në takimet me banorët, Lulzim Basha dhe Sali Berisha janë të përfshirë në fushatën e tij për kryetarin e bashkisë së Tiranës. I pyetur nëse fushatën e drejton ai vetë apo nga të tjerë, Kosova tha se fushatën e drejton Basha, me të cilin ka kontakte të vazhdueshme. Më tej, ai sqaroi se me kryetarin e PD konsultohet për çdo gjë disa herë në ditë.
Por, teksa shprehu vlerësimin për ish kryeministrin Sali Berisha, si një njeri me përvojë në fushata, Kosova tha se çdo mendim që i jep Berisha është shumë i vlefshëm, aq më tepër për të që kandidon për herë të parë në një pozicion kaq të rëndësishëm. “Bisedat që ne bëjmë dhe orientimet që ai më jep, por edhe kritika nëse unë bëj diçka që nuk duhet, janë shumë të vlefshme për punën time dhe një pjesë e mirë e suksesit tim janë dhe këshillat me të”, deklaroi Kosova dje.
