I dëshpëruar me kushtet në Kosovë dhe me kohën kundër tij, boksieri më i mirë në Kosovë, Xhoxhaj, ka vendosur të largohet drejt Gjermanisë dhe të nisë karrierë profesioniste, shkruan Koha Ditore.
Thotë se ka arritur marrëveshje për këtë dhe se kthim prapa nuk ka. Në Federatën e Boksit të Kosovës e vajtojnë largimin e tij, duke thënë se ai ishte shpresa më e madhe boksit kosovar për medalje olimpike në “Tokio 2020”. Më 2015, ishte një fitore larg medaljes në Lojërat Evropiane
Boksieri më i mirë në Kosovë, Armend Xhoxhaj, është përshëndetur nga boksi amator për të vazhduar karrierën në atë profesionist. Me këtë Kosova ka humbur shpresën më të madhe në boks.
Xhoxhaj 23-vjeçar po largohet i dëshpëruar nga Kosova. Thotë se në Kosovë nuk e ka gjetur mbështetjen e merituar as nga Komuna prej nga vjen – Prizreni, as nga Federata e Boksit e Kosovës (FBOXK) e as nga Komiteti Olimpik i Kosovës (KOK).
Ai do të vazhdojë karrierën si profesionist në Gjermani, ku ka arritur marrëveshje me menaxherin Astrit Ademaj, përgatiti Koha. (b.an)
