Bashkimi Evropian pritet të zhvillojë në ditët në vijim katër konferenca ndërqeveritare me Shqipërinë, Malin e Zi, Moldavinë dhe Ukrainën, pas vendimit të marrë nga shtetet anëtare. Lajmi u bë i ditur nga komisionerja evropiane për Zgjerimin, Marta Kos, e cila e cilësoi këtë zhvillim si një shenjë të qartë se procesi i zgjerimit të BE-së po ecën përpara.
Sipas Kos, kjo është hera e tretë që nga muaji qershor që Bashkimi Evropian zhvillon katër konferenca të tilla njëkohësisht. Ajo vlerësoi përparimin e vendeve kandidate, duke veçuar edhe vendosmërinë e Ukrainës për t’u bërë pjesë e unionit.
Megjithatë, komisionerja theksoi se, përveç përparimit në reforma, një rëndësi të veçantë ka edhe përafrimi i vendeve kandidate me politikat dhe qëndrimet strategjike të BE-së, veçanërisht në fushën e sigurisë. Sipas saj, vendet që synojnë anëtarësimin duhet të jenë në një linjë me unionin jo vetëm për politikën e jashtme dhe të sigurisë, por edhe për çështje që lidhen me sanksionet, energjinë dhe infrastrukturën.
“Ne nuk mund të pranojmë anëtarë të rinj që nuk e rrisin sigurinë tonë”, deklaroi Kos, duke shtuar se synimi është që vendet e reja anëtare ta bëjnë Bashkimin Evropian më të fortë.
Ajo riafirmoi gjithashtu rëndësinë e respektimit të së drejtës ndërkombëtare, shtetit të së drejtës dhe vlerave mbi të cilat është ndërtuar Bashkimi Evropian. Sipas saj, këto parime janë veçanërisht të rëndësishme gjatë procesit të zgjerimit.
Duke iu referuar situatës në Ballkanin Perëndimor, Kos paralajmëroi edhe për rishfaqjen e prirjeve nacionaliste në rajon, duke theksuar se respektimi i së drejtës ndërkombëtare mbetet thelbësor për ruajtjen e paqes dhe sigurisë.
Për Shqipërinë, zhvillimet e fundit janë pjesë e procesit të negociatave për anëtarësim në Bashkimin Evropian, ku përparimi varet nga përmbushja e kritereve dhe përafrimi me standardet dhe politikat e unionit.
