Korrupsioni, në pranga Drejtori i Ujësjellësit në Elbasan
Policia ka arrestuar drejtorin e Ujësjellës-Kanalizimeve në Elbasan për veprat penale korrupsion paskiv dhe shpërdorim detyre.
Sipas Prokurorisë, hetimi ndaj tij nisi në bazë të një materiali të referuar nga ana e Drejtorisë së Përgjithshme të Policisë, ku “Cenolli dyshohet për kryerjen e veprimeve abuzive në procesin e rikonstruksionit të rrjetit të ujësjellësit dhe instalimit të matësave të ujit”. Gjatë hetimeve të Prokurorisë, pozita e Drejtorit të Ujësjellësit është rënduar edhe më tej, pasi u konstatua se ndërhynte tek pedagogë të Universitetit “Aleksandër Xhuvani” për të dhënë nota kaluese kundrejt pagesave, për studentë të ndryshëm.
“Gjatë kohës që po kryheshin hetime për çështjen e ujësjellësit, u konstatua gjithashtu se drejtori Cenolli ndërhynte tek pedagogë të universitetit “Aleksandër Xhuvani” për të dhënë nota kaluese, kundrejt pagesave, për studentë të ndryshëm.
“Në vijim të këtij hetimi, rezultoi se ai bashkëpunonte me shtetasin Gazmend Laloshi (biznesmen), i cili gjithashtu është arrestuar pas vendimit të gjykatës. Bashkë me ta është arrestuar edhe shtetasi Jani Muslli, për “korrupsion aktiv…”, pasi ka paguar për të marrë diplomën universitare. Masat e sigurisë “arrest në burg” janë ekzekutuar gjatë ditës së sotme nga ana e forcave të Policisë së Shtetit”. Shtetasit e mësipërm, sipas Prokurorisë, rezulton se bashkëpunonin me shtetaset A.GJ dhe R.T, pedagoge në Universitet, ndaj të cilave është vendosur masa e sigurisë “detyrim për paraqitje”.
