Dalin të dhëna shqetësuese për nivelin e korrupsionit, ryshfetit dhe nepotizmit. Bazuar në një anketë të zhvilluar nga Lëvizja FOL me qytetarët e të gjitha komunave të vendit, shqetësimi kryesor i tyre rezulton të jetë papunësia e përcjellë nga korrupsioni dhe performanca e dobët e qeverisë, raporton KTV. Fidan Kalaja nga kjo lëvizje, ka thënë se 40% e qytetarëve korrupsionin e shohin në qeveri, 27.90 për qind mendojnë se është i shtrirë në partitë politike, ndërsa 26 për qind mendojnë se korrupsioni e ka përfshirë sistemin gjyqësor.
Rreth 32 për qind e qytetarëve kanë pranuar se kanë dhënë para apo dhurata për të marrë shërbime në institucionet publike, sidomos në sektorin e shëndetësisë. Këto të dhëna i konsideron shokuese dhe të turpshme ambasadori britanik në Kosovë, Ruairi O’Connell, transmeton Koha.net.
