Kryeministri kinez Li Qiang vuri në dukje të hënën se pala kineze është e gatshme të punojë me palën pakistaneze për të bërë përpjekje të mëtejshme që ta shndërrojë Korridorin Ekonomik Kinë-Pakistan (CPEC) në një projekt demonstrimi për bashkëpunim me cilësi të lartë në kuadër të nismës “Një brez dhe një rrugë”.
Li i bëri këto komente gjatë pjesëmarrjes në Islamabad në një ceremoni bashkë me kryeministrin pakistanez Shehbaz Sharif për përfundimin e projektit të Aeroportit të Ri Ndërkombëtar të Gwadarit.
Aeroporti i ri është një objekt kyç që porti i Gwadarit të kthehet në një qendër ndërlidhjeje rajonale dhe një simbol i rëndësishëm i thellimit të mëtejshëm të ndërtimit të CPEC-ut, tha Li.
Nga ana e tij, edhe kryeministri pakistanez Shehbaz Sharif e vlerësoi gjithashtu aeroportin si një tjetër dëshmi të miqësisë ndërmjet të dy vendeve, duke thënë se përfundimi i projektit do të lejojë që porti i Gwadarit të luajë më mirë rolin e tij si një qendër transporti dhe do të sjellë mundësi të paprecedenta zhvillimi për Pakistanin.
Pala pakistaneze është e gatshme të vazhdojë të përpiqet bashkë me palën kineze për të përshpejtuar bashkëpunimin për sa i përket “versionit të përmirësuar” të CPEC-ut dhe për të nxitur arritjen e rezultateve më të frytshme në ndërtimin e bashkësisë me një të ardhme të përbashkët Pakistan-Kinë, shtoi ai
