Projektligji për Korporatën e Investimeve do të marrë parasysh rekomandimet e Fondit Monetar Ndërkombëtar (FMN), Bankës Botërore (BB) dhe Bankës Europiane për Rindërtim dhe Zhvillim (BERZH) . Ministrja e Financave dhe Ekonomisë, Anila Denaj në një prononcim për mediet tha sot se, “projektligji është aprovuar nga Këshilli i Ministrave dhe është një proces që në trajektoren e tij, të diskutimeve do të marrë parasysh edhe rekomandimet e FMN, BB dhe BERZH-it, të cilat ne jemi duke i analizuar dhe duke gjetur një mënyrë sesi të marrim eficensë të zbatimit të tij dhe ta implementojmë aty ku është e nevojshme”.
Sipas draftit që shoqëron këtë projektligj, parashikohet krijimi i Korporatës së Investimeve Shqiptare, e cila vjen si një koncept inovator për të adresuar nevojën e zhvillimit të krijimit të kapaciteteve për lehtësimin dhe realizimin e investimeve komplekse dhe me impakt social-ekonomik.
Korporata krijohet si shoqëri tregtare, e organizuar në formën e një shoqërie
aksionare, ku ministri përgjegjës për ekonominë është në cilësinë e autoritetit publik, që përfaqëson shtetin si pronar të aksioneve të Korporatës. Institucionet financiare ndërkombëtare të zhvillimit mund të zotërojnë aksione të Korporatës.
Objekti i veprimtarisë së Korporatës është përmirësimi i menaxhimit të pronës publike, krijimi i pronave të reja, vënia në përdorim më efiçent të pronave, përgatitja dhe zbatimi i projekteve të investimit dhe mobilizimi i kapitalit shtetëror ose privat, me qëllim kryerjen e investimeve në funksion të zhvillimit ekonomik të vendit.
Objektivi kryesor i aktiviteteve të Korporatës konsiston në krijimin e kushteve të favorshme për të rritur investimet në vend, diversifikimin e prodhimtarisë dhe eksporteve, krijimin e ekspertizës për hartimin dhe zbatimin e projekteve komplekse të investimit, si dhe pajisjen e shtetit shqiptar me një kapacitet të munguar për realizimin e investimeve. Efektet e funksionimit të Korporatës do të ndihen në krijimin dhe forcimin e
hallkave ekonomike rreth projekteve të investimit që do të kryejë Korporata,
rritjen e punësimit, transformimin e zonave ku do të bëhen investimet e
Korporatës, lehtësimin për tërheqjen e investitorëve dhe shtimin e
marrëdhënieve ndërmjet sektorit publik e privat.
Fusha e veprimtarisë dhe mjetet që i duhen Korporatës për të kryer funksionet e parashikuara kërkojnë përgatitjen e kuadrit ligjor specifik dhe ky projektligj do të pasohet me disa vendime të Këshillit të Ministrave për të bërë të mundur zbatimin e ligjit dhe rregullimin e plotë të veprimtarisë së Korporatës, në funksion të efektivitetit në përmbushjen e funksioneve dhe misionit të saj, pajtueshmërinë me sistemin ligjor dhe bashkëpunimin me institucione të tjera publike ose ndërkombëtare.
g.kosovari
