Përhapja e koronavirusit mori përmasa shqetësuese në Shtetet e Bashkuara, pasi nga e premtja po raportohen raste infektimesh të pacientëve që nuk kanë histori udhëtimi në vendet e prekura apo takime me të tjerë të infektuar.
Tre raste të tilla u raportuan në shtetet amerikane të Kalifornisë, Oregonit dhe Uashingtonit.
Brenda kësaj jave në Shtetet e Bashkuara janë raportuar 65 raste infektimesh, por deri më tani ato janë lidhur me udhëtimet jashtë vendit apo kontaktit me persona që kishin udhëtuar.
Përveç Kinës, epiqendra e epidemisë, Koreja e Jugut është numëron mijëra të infektuar, ku vetëm të premten autoritetet raportuan 594 raste të reja.
Shumica e infektimeve janë lidhur me një sekt fetar, ku disa javë më parë një person i infektuar kishte marrë pjesë në një meshë me mbi 4000 vetë.
Në Itali numri i infektimeve u rrit me të paktën 40 për qind. Rajoni më i prekur mbetet Lombardia, ndërsa gjithsej mbi 800 vetë janë infektuar e 21 kanë humbur jetën.
Organizata Botërore e Shëndetësisë po i ndjek rastet me shqetësim edhe në Iran ku jo zyrtarisht mësohet se kanë humbur jetën nga koronavirusi mbi 200 vetë, e dhënë e hedhur poshtë menjëherë nga Ministria e Shëndetësisë.
ShBA-ja i ofroi ndihmë Irani për të frenuar epideminë, por ajo u refuzua nga Teherani zyrtar.
Ekziston gjithashtu frika se Koreja e Veriut po fsheh rastet e infektimit, pasi agjencia zyrtare e lajmeve citoi udhëheqësin Kim Jong Un të kërkonte gjatë mbledhjes së Byrosë Politike marrjen e të gjitha masave për të frenuar përhapjen e virusit.
Tre pacientë të tjerë nga Anglia kanë testuar pozitive për koronavirus, duke e çuar numrin e përgjithshëm të rasteve në Mbretërinë e Bashkuar në 23.
Që nga koha kur ai shpërtheu në Wuhan të Kinës, në fund të vitit të kaluar, koronavirusi ka infektuar më shumë se 84,000 dhe vrau të paktën 2.924.
g.kosovari
