Koronavirusi vazhdon të përhapet në të gjithë botën. Mbretëria e Bashkuar ka konfirmuar rastet e para të virusit vdekjeprurës.
Bëhet fjalë për dy raste të para të koronavirusit Wuhan në Britani.
Pacientët, të cilët janë anëtarë të së njëjtës familje, po trajtohen nga Shërbimi Kombëtar i Shëndetit në veri-perëndim të Anglisë.
“Pacientët janë duke marrë kujdesin mjekësor dhe ne jemi po përdorim procedura të kontrolluara për të parandaluar përhapjen e mëtejshme të virusit,”-tha profesori Chris Whitty në një deklaratë, duke shtuar se zyrtarët shëndetësorë po punojnë për të identifikuar personat e tjerë me të cilët pacientët mund të kenë rënë në kontakt.
Ndërsa në Gjermani është konfirmuar rasti i 5-të me koronavirus në shtetin jugor të Bavarisë. Pacienti ishte punësuar në të njëjtin vend pune me katër personat e tjerë që morën virusin nga një kolege që vizitoi Kinën.
“Kemi dy raste të konfirmuara të koronavirusit në Itali”. Kështu deklaroi dje kryeministri italian Giuseppe Conte duke shtuar se ata janë dy turistë kinezë, burrë e grua 67 dhe 66 vjeç nga provinca Wuhan. Kryeministri italian tha më tej se të gjitha masat paraprake tashmë janë marrë: të dy janë izoluar në spitalin Spallanzani në Romë. Trafiku ajror drejt dhe nga Kina u mbyll.
Dhoma e hotelit, ku çifti kinez kishte qëndruar është mbyllur për t’u dekontaminuar. Të dy kishin mbërritur në Milano (aeroporti i Malpensas) më 23 janar dhe pas disa fazave të ndërmjetme mbërritën në Romë ku ishin ndjerë keq të mërkurën në mbrëmje. Masa shtesë parandaluese mund të zbatohen kundër automjeteve dhe personave me të cilët çifti kishte rënë në kontakt. Gjatë operacioneve të para të ndihmës, policët gjithashtu hartuan një raport i cili më pas iu dërgua Ministrisë së Shëndetësisë.
Autoritetet shëndetësore në Selanik, Greqia veriore, kanë deklaruar edhe të prekurin e parë nga Koronavirusi i përhapur në Whan.
Sipas mediave të huaja një burrë u paraqit në spitalin AHEPA me simptoma të ngjashme të korona. Ky është rasti i parë i dyshuar i koronavirusit në Greqi.
Sipas drejtorit të AHEPA-s, Panagiotis Panteliadis, pacienti është një burrë i moshës së mesme me simptoma të virusit, që kohët e fundit kishte vizituar Kinën.
Pacienti shkoi vetë në spital. Rasti raportohet të jetë konfirmuar nga Ministria Greke e Shëndetësisë.
Sipas mediave, pacienti është një grek 63-vjeçar që kishte udhëtuar së fundmi në Kinë dhe në Wuhan, qyteti ku shpërtheu virusi.
AHEPA është një nga 13 spitalet në të gjithë vendin që janë caktuar nga Ministria e Shëndetësisë për të trajtuar rastet e mundshme të koronavirusit. Pacienti aktualisht është në karantinë në spital, raportojnë mediat greke.
Ndërkohë Organizata Botërore e Shëndetit (WHO) shpalli të enjten gjendjen e emergjencës. Koronavirusi deri tani raportohet se u ka marrë jetën 213 personave dhe po vazhdon të përhapet në të gjithë botën.
Në territorin e Kinës janë konfirmuar deri tani 9.709 raste.
Ndërsa ka më shumë se 140 raste të konfirmuara të virusit jashtë Kinës kontinentale, përfshirë 6 në Shtetet e Bashkuara.
Afro 60 milion njerëz janë bllokuar përkohësisht ose me kohë të pjesshme në qytetet kineze për një javë.
Disa vende janë duke dërguar aeroplanët për të evakuuar qytetarët e huaj të bllokuar në Wuhan.
