Një person në shtetin e Uashingtonit ka vdekur nga koronavirusi, duke shënuar rastin e parë të vdekjes në SHBA. Lajmi u njoftua të shtunën nga zyrtarët e shëndetit publik.
Sipas CNN, zyrtarët e shëndetit publik në SHBA, nuk dhanë shumë detaje vetëm u konfirmua se viktima është një grua.
Në një konferencë për shtyp në Shtëpinë e Bardhë, Presidenti Donald Trump tha se pacientja ishte një grua në të 50-at dhe ishte me një rrezik të lartë mjekësor. Asnjë informacion i mëtejshëm në lidhje me udhëtimin e pacientit dhe historinë mjekësore nuk ishte në dispozicion menjëherë.
Duke folur para kombit, Trump shprehu ngushëllime familjes së pacientit që vdiq dhe iu drejtua shpërthimit, duke i bërë thirrje që të gjithë jenë të qetë edhe pasi tha se përhapja e virusit duket e pashmangshme.
“Rastet shtesë në Shtetet e Bashkuara janë të mundshme, por individët e shëndetshëm duhet të jenë në gjendje të shërohen plotësisht,” tha ai. ‘Njerëz të shëndetshëm – nëse jeni të shëndetshëm, me siguri do të kaloni një proces dhe do të jeni mirë.‘
Trump u bëri thirrje politikanëve dhe mediave që të mos provokojnë panik por të sensibilizojnë qytetarët. “Nuk ka asnjë arsye për të hapur panik“, tha ai.
Të premten Shtetet e Bashkuara raportuan rastin e katërt me koronavirus tek një tjetër person që autoritetet thonë se nuk e dinë origjinën e infektimit të tij.
Rasti më i ri u konfirmua në shtetin e Uashingtonit. Autoritetet në Oregon njoftuan gjithashtu të premten për një pacient i cili sipas tyre dyshohet se mund të jetë bartës i virusit.
Koronavirusi u përhap të premten edhe në shtatë vende të tjera duke bërë që Organizata Botërore e Shëndetësisë të rrisë alarmin e rrezikut në nivelin më të lartë.
Meksika, Nigeria, Zelanda e Re, Lituania, Bjellorusia, Azerbajxhani dhe Islanda raportuan rastet e tyre të para me virus të premten.
Tashmë numri i vendeve të goditura nga COVID-19 ka arritur në rreth 60 në të gjithë botën. /Javanews
g.kosovari
