Diktatori i Koresë së Veriut, Kim Jong Un, mesa duket po përgatit ushtarët e tij për misione vetëvrasëse.
“Daily Mail” raporton se shteti komunist mund të nisë një sulm me bomba nga ajri mbi Korenë e Jugut.
Aludimet nisën pas publikimit të disa imazheve nga media koreano-veriore, ku tregohen avionë të vegjël të vitit 1947 që po kryenin stërvitje, përcjell tvklan.al.
Sipas aludimeve, këta avionë të vjetër kanë avantazhin që të mos kapen nga radarët modern pasi fluturojnë në lartësi të ulëta.
Po kështu, fluturojnë me shpejtësi të vogël dhe janë programuar që të mos kthehen në destinacion, duke bërë që ushtarët të kryejnë misione vetëvrasëse.
Në pamjet e publikuara nga Koreja e Veriut, ushtarët shfaqen gjithashtu duke u hedhur me parashutë nga këta avionë.
Fundi i krahëve të tyre është i lyer me blu, kurse pjesa e sipërme me ngjyrë të gjelbër si një formë maskimi që të mos duket nga avionët supersonikë që fluturojnë në lartësi të mëdha.
Ekziston frika, shkruan “Daily Mail”, që Kim Jong Un të planifikojë lëshimin e një bombe mbi Korenë Jugore duke përdorur këta avionë të vegjël të ndërtuar në vitin 1947.
Megjithatë, ashtu si dhe herët e tjera, Koreja e Veriut publikon pamje të fuqisë së saj ushtarake vetëm për propagandë./a.m.
