Përmendja gjithnjë e më shpeshtë e ndarjes së Kosovës flet për dështimin e Marrëveshjes së Brukselit, thotë Dragisha Mijaçiq nga Konventa Kombëtare për Bashkimin Europian, transmeton Koha.net.
Ai, siç përcjell tvn1, thotë se qëllimi Marrëveshjes ka qenë integrimi i veriut në sistemin politik të Kosovës.“Kosova është çështje e të gjitha çështjeve, çështje e gjeneratës sonë dhe atë nuk duhet bartur gjeneratave të ardhshme. Dhe tash është koha për zgjidhjen e çështjes së Kosovës”, ka thënë ai.
Mijaçiq ka përkujtuar se kryetari i Serbisë dhe ai i Kosovës, Aleksandar Vuçiqi dhe Hashim Thaçi vetëm gjatë këtij viti janë takuar tri herë por takimet nuk kanë dhënë kurrfarë rezultatesh ,ndërsa ka shtuar se në tryezë gjenden edhe propozime zgjidhjesh kundërthënëse.
Sipas tij, të gjitha burimet jo zyrtare flasin se njëra nga temat është edhe ndarja e Kosovës. Ai mendon se ndarja megjithatë nuk është zgjidhje e mirë dhe përkujton se 90 për qind e serbëve jeton në jug të Ibrit.
“Shtrohet pyetja, se a është më me rëndësi për Serbinë 10 për qind e territorit të Kosovës apo njerëzit që jetojnë atje. Zgjidhje e vërtetë për Serbinë është ruajtja e banorëve serbë jo sot, por për 20, 30, 50 vjet”, thotë Mijaçiq .
Ai ka përfunduar se veç për ndarje, mund të flitet edhe për kushte shtesë, siç është Asociacioni i Komunave serbe në jug të Ibrit dhe për eksterritorialitetin e objekteve fetare, përgatiti Express. (b.an)
