Një ditë krejt shqiptare në Kalabri, ku përfaqësues nga të trevat shqiptare, Shqipëri, Kosovë, Mal i Zi, Maqedoni e Veriut u mblodhën tek vëllezërit përtej Adriatikut. Si kurorë e këtij bashkimi ishte edhe pasardhësi i familjes Kastrioti.
Mikpritësi i kësaj ngjarjeje të rëndësishme ishte kryetari i komunës San Demetrio Corone, Ernesto Madeo. Ndërkohë, pjesëmarrësit nga Shqipëria, të kryesuar nga prefekti i qarkut Tiranë, Shkëlqim Hajdari, ndezën skenën e teatrit të sapoinauguruar, me një spektakël të mrekullueshëm artistësh me emër si Fatos Qerimi, orkestra e SIGAL dhe artistë e grupe të tjera nga trojet shqiptare. Kontribut të veçantë për këtë aktivitet patën dhe botuesit e gazetës “Alpet Shqiptare” , Ramiz dhe Arbër Lushaj.
Kulmi i kësaj ngjarjeje ishte mishërimi i projektit të prefektit Shkëlqim Hajdari për kthimin në muze kombëtar të shtëpisë së lindjes së poetit tonë të rilindjes Jeronim De Rada. Për realizimin e këtij projekti duhen kryer disa proçedura, që nga blerja e banesëse, restaurimi deri në kthimin e saj në muze dinjitoz.
Për realizimin e këtij projekti nën kujdesin e prefektit Hajdari u krijua dhe një bord, në të cilin bëjnë pjesë kryetari i komunës San Demetrio Corone, Ernesto Madeo, kryetari i bashkisë Strugë, Mendi Qyra, botuesi i njohur, i lidhur ngushtë me komunitetin arbëresh, Fatmir Toçi dhe filantropi Ramiz Tafili.
Ky bord nisi menjëherë nga puna për të realizuar mbledhjen e fondeve për muzeun “De Rada” njëkohësisht dhe për organizimin së afërmi në Tiranë një simpozium mbi jetën dhe veprën e njërit prej poetëve më të rëndësishëm të Rilindjes sonë kombëtare, Jeronim De Rada.
