Policia e Vlorës ka arrestuar Olsi Nexhipin, djali i Huqmet Nexhipit, i cili u vra dje. 24 orë pas vrasjes së kryefamiljarit, familja Nexhipi do të përballet me një tjetër dramë. Djali 24-vjeçar është arrestuar për armëmbajtje pa leje dhe lëndë narkotike.
Gjatë një kontrolli të ushtruar në banesën e këtij shtetasi, në lagjen “Kushtrimi”, në një nga dhomat e kësaj banese policia ka gjetur të fshehura: një pistoletë të llojit “Beretta”; 11 fishekë të kalibrit 9mm; 115 gram lëndë narkotike, të llojit “Cannabis sattiva”, si dhe materiale të paligjshme të cilat janë bllokuar dhe sekuestruar në cilësinë e provës materiale.
Kontrolli në banesën e viktimës, Hyqmet Nexhipi është bërë në kuadër të hetimeve për vrasjen e tij.
Materialet i kaluan Prokurorisë në ngarkim të këtij shtetasi për veprat penale “Prodhim dhe mbajtje pa leje e armëve luftarake dhe municionit” dhe “Prodhim dhe shitje e narkotikëve”.
VRASJA
52-vjeçari Hyqmet Nexhipi, pronari i anijes së peshkimit, “Drita” u ekzekutua mëngjesin e së shtunës në rrugën “Transballkanike” në Vlorë. Kanë qenë banorët e zonës, ata që kanë gjetur trupin e pajetë të 52-vjeçarit brenda mjetit të tij tip “Honda”, pranë një karburanti.
Sipas raportimeve, autorët pasi janë siguruar që kanë vrarë pronarin e anijes, kanë djegur 2 km më tutje në lagjen “24 Maji” mjetin me të cilin udhëtonin, një “Benz” me targa DR 4863B. Mjeti në fjalë dyshohet se ka qenë i vjedhur. Në momentin e atentatit, autori ka qenë duke lëvizur me mjetin e tij, ndërsa është qëlluar nga afër në anën e shoferit.
Pistat e hetimit janë disa, ndërsa nuk përjashtohet as ndonjë konflikt i mundshëm që mund të ketë pasur viktima. Viktima Hiqmet Nexhipi ishte person me precedent penal, ndërsa ishte dënuar vite më parë në Itali.
