Në vijim të kontrolleve të territorit nga toka dhe ajri, me dronë, me qëllim parandalimin dhe goditjen e veprimtarisë kriminale në fushën e kultivimit të kanabisit, në Maliq u finalizua operacioni i koduar “Dobërçani”.
Pas hetimeve dy mujore u arrestua në flagrancë autori i dyshuar për kultivim të kanabisit, si dhe kryeplaku i fshatit për “Shpërdorim detyre”.
Gjatë operacionit u vu në pranga Fidai Kula, 29 vjeç banues në fshatin Gopesh.
Nga tërësia e hetimeve të kryera, përdorimit të dronit, si edhe gjatë kontrollit që forcat e policisë ushtruan në vendin e quajtur “Shkëmbi i Dobërçanit”, njësia administrative Moglicë, u konstatuan në një sipërfaqe të hapur enkas fidanë kanabis të kultivuar.
Në momentin e ndërhyrjes, shërbimet e policisë kapën në flagrancë shtetasin Fidai Kula, i cili dyshohet të jetë kultivuesi i tyre.
Gjithashtu gjatë operacionit u vu në pranga dhe shtetasi Hydri Kula, 49 vjeç, me detyrë kryeplak i fshatit Gopesh i cili dyshohet se ka shpërdoruar detyrën, pasi kishte detyrim që të ushtronte kontrolle territori dhe të njoftonte organet e policisë, në rast se do të konstatonte ushtrimin e kësaj veprimtarie kriminale.
Ndaj të dyshuarve për ndjekje të mëtejshme, materialet iu referuan Prokurorisë së Korçës.
g.kosovari
