Komisioni Evropian ka publikuar një version të redaktuar të kontratës me kompaninë AstraZeneca, për vaksinën Covid.
Ditët e fundit, ka pasur një luftë të ashpër për furnizimin me vaksina. Më herët shefja e KE, Ursula von der Leyen foli ashpër për kompaninë në lidhje me vendimin e saj për të ulur furnizimet për BE. Ajo tha se kontrata është e pastër si kristal.
Vaksina e AstraZeneca ende nuk është miratuar për përdorim në BE, ndërsa pritet që kjo të ndodhë sot.
Marrëveshja e nënshkruar në gusht, ishte për 300 milion doza për Bashkimin Evropian që do të dorëzohen pas miratimit të vaksinës për përdorim. Në të parashikohej mundësia për të marrë edhe 100 milionë doza më shumë. Por BE thotë se tani pret të marrë vetëm rreth një të katërtën e 100 milionë vaksinave që ata prisnin të merrnin deri në mars, me një mungesë prej rreth 75 milion dozash.
AstraZeneca thotë se problemet për prodhimin e vaksinave, janë në fabrikat që ndodhen në Holandë dhe Belgjikë. BE është nën presion pas kritikave se ritmi i shpërndarjes së vaksinave në disa vende anëtare ka qenë shumë i ngadaltë. Furnizimet e një vaksine tjetër, të prodhuar nga Pfizer-BioNTech, gjithashtu kanë rënë për shkak të prodhimit të paktë.
/a.r
