Hetimi i nisur nga një prokurori në Itali, mbi një grup kriminal që kontrabandonte gaz të ftohtë kinez, që gjen përdorim tek frigoriferët dhe kondicionerët, ka përfshirë edhe SPAK. Në zbatim të një letër-porosie të palës italiane, të pranuar nga GJKKO, SPAK duhet të identifikojë dhe filtrojë pasuritë dhe llogaritë bankare në Shqipëri të 9 shtetasve të huaj, të dyshuar si anëtarë të grupit kriminal.
SPAK ka vënë në shënjestër pasuritë e luajtshme e të paluajtshme dhe llogaritë bankare të 9 shtetasve të huaj në Shqipëri dhe 7 kompanive tregtare, me kërkesë të drejtësisë italiane.
Përmes një letër porosie, nga prokuroria e Torre Annunziata në Itali, hetuesit italianë kanë kërkuar gjurmimin dhe verifikimin e të dhënave financiare për 5 italianë, 3 bullgarë dhe një ukrainas. Ata dyshohet të jenë pjesë e një grupi kriminal, që kontrabandojnë gaz ftohës të blerë në Kinë, gazi industrial që gjen përdorim tek frigoriferët dhe kondicionerët. Sipas vendimit gjyqësor, që i dha dritë jeshile ekzekutimit të letër-porosisë italiane, hetuesit e vendit fqinj kanë identifikuar 9 persona si anëtarë të grupit.
Ata dyshohet se mes kompanive me seli në Itali dhe jashtë saj kanë importuar gaz ftohës nga Kina, duke shmangur kontrollet doganore dhe taksat. Më pas malli ruhej, modifikohej, falsifikohej dhe rishitej në Itali me çmime më të ulëta se ato të tregut, duke prodhuar edhe fatura fiktive, apo transaksione false.
Mekanizmi kriminal u zbulua nga hetuesit italianë përmes sekuestrimit të shumë bombolave të gazit, përgjimeve telefonike, regjistrimeve video duke vendosur kamera pranë dhe brenda depove e kompanive të përfshira.
Prokurorët italianë pretendojnë se një pjesë e fitimeve janë transferuar në llogari të huaja, ndërsa pagesat për gazin ilegal janë paguar kryer përmes urdhërxhirimeve bankare në llogari të huaja nga banka në Shqipëri, Bullgari, Greqi, Belgjikë, Holandë, Luksemburg e Holandë.
Për këtë shkak, sipas letër-porosisë, SPAK duhet të identifikojë pasuritë e luajtshme e të paluajtshme në Shqipëri të 9 të dyshuarve dhe 7 shoqërive tregtare, si edhe llogaritë bankare të tyre.
Në rastin e llogarive bankare, SPAK duhet të kryejë analiza financiare hyrëse e dalëse duke nisur nga janari 2025.
