Rreth 332 mijë kërkesa për mbrojtje ndërkombëtare janë paraqitur në vendet e Bashkimit Evropian dhe në katër vendet e asociuara të zonës Shengen gjatë gjysmës së parë të vitit 2026. Shifra shënon një rënie prej 17% krahasuar me të njëjtën periudhë të vitit të kaluar.
Të dhënat publikohen në raportin e fundit të Agjencisë së Bashkimit Evropian për Azilin (EUAA), “Latest Asylum Trends: Mid-Year Revieë 2026”.
Ky është niveli më i ulët i kërkesave për azil i regjistruar në një gjashtëmujor të parë që nga viti 2021 dhe, duke përjashtuar vitet e pandemisë, niveli më i ulët që nga viti 2019.
Sipas EUAA-së, rënia lidhet pjesërisht me ndryshimin e përbërjes së kombësive të aplikantëve, veçanërisht pas zhvillimeve politike në Siri, si dhe me përpjekjet e vendeve të BE-së për forcimin e bashkëpunimit me vendet e origjinës dhe të tranzitit të migrantëve.
Italia, vendi i dytë për numrin e kërkesave
Franca ishte destinacioni kryesor për aplikantët për azil gjatë gjysmës së parë të vitit, me rreth 69 mijë kërkesa, ose afërsisht një të pestën e totalit.
Në vendin e dytë renditet Italia, me rreth 66 mijë kërkesa. Pas saj vijnë Spanja dhe Gjermania, me rreth 55 mijë kërkesa secila.
Në total, këto katër vende pritën rreth 75% të të gjitha kërkesave për azil të paraqitura në hapësirën BE+, një përqindje pak më e ulët krahasuar me periudhat e mëparshme, kur këto vende përballonin rreth katër të pestat e kërkesave.
Italia mbi mesataren evropiane për numrin e kërkesave për banor
Kur të dhënat llogariten në raport me popullsinë, Italia regjistroi 1.127 kërkesa për azil për çdo milion banorë, ndërsa mesatarja për hapësirën BE+ ishte 710 kërkesa për milion banorë.
Italia renditet pranë Spanjës, Francës, Belgjikës dhe Irlandës për këtë tregues. Niveli më i lartë u regjistrua në Greqi, me 2.254 kërkesa për milion banorë.
Bangladeshasit kryesojnë në Itali
Në Itali, shtetasit e Bangladeshit vijojnë të përbëjnë grupin më të madh të aplikantëve, me rreth 28 mijë kërkesa, një shifër pothuajse e pandryshuar krahasuar me periudhën e mëparshme, me një rënie prej vetëm 3%.
Ndërkohë, kërkesat e shtetasve egjiptianë u rritën me 50%, duke arritur në rreth 15 mijë. Rritje të ndjeshme u regjistruan edhe te aplikantët nga Afganistani (+77%), Kina (+43%) dhe Sri Lanka (+23%). Në të kundërt, kërkesat nga shtetasit e Marokut ranë me 22%, ndërsa ato nga Peruja me 12%.
Të dhënat e EUAA tregojnë kështu një ndryshim të rëndësishëm në dinamikën e azilit në Evropë gjatë vitit 2026, me një rënie të përgjithshme të numrit të aplikimeve, por me ndryshime të dukshme në origjinën e aplikantëve dhe në shpërndarjen e tyre mes vendeve pritëse.
