Me shitjen e drogës në kryeqytet kanë filluar të merren edhe ata që janë apo sapo kanë mbaruar gjimnazin. Policia e Tiranës i vuri prangat tre adoleshentëve, 16 dhe 17-vjeçarë në orët e fundit, të akuzuar për “Prodhimi dhe shitja e narkotikëve”.
Sipas bluve, në kuadër të operacionit të koduar “Kontaktuesit”, zhvilluar nga Komisariati i Policisë Nr. 2, u bë arrestimi në flagrancë i shtetasve: H. D., 17 vjeç, R. B., 16 vjeç dhe M. U., 17 vjeç.
Gjatë kontrollit fizik nga shërbimet e Policisë, këtyre shtetasve iu gjetën dhjetëra doza me lëndë të dyshuar narkotike të llojit cannabis sativa.
“Këta shtetas, pasi siguronin sasi të konsiderueshme të lëndës narkotike cannabis sativa, e shisnin atë në zonën e quajtur “Ish-parku” dhe në zona të ndryshme të qytetit të Tiranës”, bëri me dije policia.
Nërkohë që në një tjetër operacion, të koduar “Sharra”, zhvilluar nga Komisariati i Policisë Nr. 6, në pranga përfundoi një 32 vjeçae, të cilin iu sekuestruan lëndë narkotike e llojit kokainë e ndarë në doza, gati për shitje, dhe bimë të dyshuara narkotike cannabis sativa.
“Në kuadër të operacionit policor të koduar “Sharra”, u bë arrestimi në flagrancë i shtetasit R. L., 32 vjeç, banues në Tiranë, për veprat penale “Prodhimi dhe shitja e narkotikëve” dhe “Kultivimi i bimëve narkotike”.
Shtetasi R. L. kishte kultivuar bimë të dyshuara narkotike cannabis sativa, në fshatin Sharrë, në vendin e quajtur “Përroi i Lamucve”. Gjatë kontrollit fizik ndaj këtij shtetasi, shërbimet e Policisë gjetën një sasi lënde të dyshuar narkotike të llojit kokainë, të ndarë në doza, gati për shitje, të cilat u sekuestruan, në cilësinë e provës materiale, së bashku me bimët narkotike.
Pas verifikimeve të kryera ka rezultuar se shtetasi R. L., pasi kultivonte bimë narkotike, e përgatiste lëndën narkotike cannabis sativa në doza, gjithashtu siguronte lëndë narkotike kokainë, të cilën e ndante në doza, dhe i shiste më pas, në zona të ndryshme të Tiranës”, njofton policia.
Materialet i kaluan Prokurorisë, për veprime të mëtejshme procedurale.
g.kosovari
