Shqipëria dhe Kosova do të kenë konsullatën e tretë të përbashkët.
Pas Milanos e Mynihut do të jetë Konsullata e Shqipërisë në Bari të Italisë së Jugut ajo që do t’iu shërbejë edhe shtetasve të Kosovës që jetojnë në Jugun e Italisë, shkruan Koha Ditore.
Ministria e Punëve të Jashtme e Republikës së Shqipërisë dhe Ministria e Punëve të Jashtme e Republikës së Kosovës, të enjten, gjatë vizitës së ministrit të Jashtëm kosovar, Enver Hoxhaj, në Tiranë, në kuadër të Konferencës së Ambasadorëve, bëjnë me dije se nën ombrellën që krijon marrëveshja e vendosur mes dy palëve për të bashkëpunuar dhe mbështetur njëra-tjetrën në shërbimin diplomatik dhe atë konsullor, do të hedhin edhe një hap tjetër, duke përforcuar nivelin dhe stadin e marrëdhënies në përfaqësimin e përbashkët Shqipëri-Kosovë.
Kjo do të bëhet nën ombrellën që krijon marrëveshja e vendosur mes dy palëve për të bashkëpunuar dhe mbështetur njëra-tjetrën në shërbimin diplomatik dhe atë konsullor, duke përforcuar kështu nivelin dhe stadin e marrëdhënies në përfaqësimin e përbashkët Kosovë –Shqipëri, citohet Koha. (b.an)