Kryetari i Grupit Parlamentar të Partisë Socialiste Gramoz Ruçi ishte në të njëjtën linjë me kreun e e kësaj force Edi Rama, sa i takon vlerësimit të figurës së Fatos Nanos për atë që ika dhënë selisë rozë. Ruçi falenderoi Nanon për kontributet e tij, që sipas Ruçit i’u desh të bënte 4 vite burg vetëm pse ishte kryetar i PS.
Ruçi: Ky Kongres mblidhet 3 muaj para kremtimit të 25 vjetorit të themelimit të PS, ndaj do ta nisja fjalën me një përshëndetje të posaçme për të gjitha ato dhe ata mijëra gra e burra, që aderuan në forcën tonë politike në 25 vjet, që dhanë gjithçka për mbijetesën tonë, rritjen dhe reformimin e arritjet tona 25 vjeçare…Faleminderit, atij që dha gjithcka për rritjen, forcimin, përballimin e vështirësive të lindjes dhe rritjes, që bëri 4 vjet burg për të vetmin faj që kishte bërë se ishte kryetari jonë, të atij që edhe me aktin e fundit të dorëheqjes në 2005 dhe leksionin e fundit të demokracisë, Fatos Nanos. Ju drejtohem të gjithëve juve që drejtuat këto vite, PS është shtëpia juaj, ju thërret dhe ju kërkon ta falni edhe kur ka gabuar, përvoja juaj është jetike në çdo kohë për të përmbushur shpresat për një Shqipëri më të integruar në BE”.
Por ndërkohë Ruçi ka thumbuar deputetin Koço Kokëdhima gjatë fjalës së mbajtur për të ashtuquajturat projekte pilot për riorganizimin e partisë në përgatitje për zgjedhjet e vitit 2017. Kreu i deputetëve socialist shprehu hapur kundërshtinë e tij ndaj propozimit të Kokëdhimës.
Ruçi: Përgatitja e partisë për zgjedhjet e 2017, për mua tre pika janë jetike, e para fryma brenda nesh, nga mënyra si do diskutojmë edhe sot, çfarë do diskutojmë si do ta dëgjojmë njëri-tjetrin, edhe kur ndahemi me njëri- tjetrin në mendime ta vendosë vota dhe fushata e fshehtë e pastaj ta pranojmë. Anëtarësinë edhe elektoratin ta dëgjojmë para se të pretendojmë të na dëgjojë, më pak takime publicitare, më shumë zgjidhje që na adresohen, frymë dmth ta ndjesh anëtarësinë. Këtu është fjala që nga telefonat e mbyllur, zyrat e mbyllura, para se të mbyllen të rrisin kontaktet njerëzore për të gjithë elektoratin e PS.
Së dyti organizimi i partisë, do varet nga rregullat që do miratojmë, jam për rregulla të forta. Ashtu si familjen e mban morali, shtetin ligji, partinë e mban rregulli. Jam për domosdoshmërinë e zbatimit të këtyre rregullave, jam për unifikim dhe zbatim të unifikuar në gjithë territorin jo të ashtuquajturat projekte pilot”.
