Në shënimet e javës në podcastin “Flasim”, Kryeministri Edi Rama renditi disa prej zhvillimeve më të rëndësishme të ditëve që lamë pas, duke i lidhur me rrugëtimin europian të Shqipërisë, forcimin e shtetit të së drejtës dhe modernizimin e qeverisjes.
Ai i cilësoi këto zhvillime si pjesë e një procesi të pandalshëm reformash që po e afrojnë vendin me objektivin historik të anëtarësimit në Bashkimin Europian. “Janë reforma dhe transformime që forcojnë institucionet demokratike, sundimin e ligjit, transparencën dhe mirëqeverisjen,” u shpreh Rama.
Një nga ngjarjet kryesore të javës ishte sesioni hapës i Kongresit Botëror të Ligjit, i mbajtur në Tiranë.
Kryeministri e cilësoi këtë si një moment historik për vendin, duke shtuar se, “Diçka e paimagjinueshme deri disa vite më parë, sepse kjo nuk është thjesht një ngjarje për turizmin apo zhvillimin ekonomik. Kjo është një ngjarje që përcakton hapjen e një epoke të re, të konfirmuar nga respekti i platformës së Kongresit Botëror të Ligjit, i cili nuk do të vinte kurrë në Shqipërinë e disa viteve më parë”.
Ai theksoi se fakti që Tirana u zgjodh për të mbledhur figura të rëndësishme të së drejtës është një konfirmim i transformimit që ka ndodhur në vend.
“Kjo lidhet pikërisht me konfirmimin e këtij transformimi, me përkushtimin e shteteve demokratike ndaj sundimit të ligjit dhe me vullnetin e shumicave qeverisëse për të garantuar paprekshmërinë e sistemit të drejtësisë,” u shpreh Kryeministri.
Në vijim, Rama nënvizoi se ky është një tjetër arsye për të qenë krenarë për reformën në drejtësi, por edhe për të qëndruar të vendosur në vazhdimin e saj.
“Është një arsye për të qenë jo thjesht krenarë për reformën në drejtësi, por të vendosur për ta çuar atë përpara, duke i qëndruar besnik vendimit historik për të ndarë politikën nga drejtësia dhe pushtetin ekzekutiv e legjislativ nga pushteti i drejtësisë,” tha ai.
Kryeministri e mbylli mesazhin duke theksuar se reforma në drejtësi është një proces i madh dhe i përbashkët, ku “jo vetëm shpata, por edhe sytë e mbyllur dhe peshorja për të qenë e barabartë e e drejtë me të gjithë janë pjesë e kësaj përpjekjeje.”
