Zgjedhja e kryetarit të PS bëhet me parimin një anëtar një votë, një herë në katër vjet. Kështu e ka nisur fjalën e tij Petrit Ago, anëtari i Asamblesë Socialiste i njohur për qëndrimin e tij kritik.
Ai tha se ndjesa e Ramës për shkeljet statutore ka qenë e pasinqertë.
“E vërteta ndihmon në ecjen përpara. Berisha u rikthye në pushtet jo për shkak të meritave, por për shkak të keqeverisjes sonë. Sot njerëz pa asnjë lloj kontributi në PS drejtojnë kudo. Kam frikë se e njëjta gjë si në vitin 2005, do të përsëritet me PS sot” – tha Ago.
Nga ana tjetër ai deklaroi se ka disa arritje nga qeverisja tre-vjeçare siç janë një pjesë e reformave dhe aksioni për energjinë elektrike.
“Rama kërkoi të vinte si kryeministër për të mbetur në histori. Në program thuhej se prioritet ishte bujqësia, turizmi etj. Dua të them se ky premtim shpresëdhënës nuk është mbajtur” – deklaroi anëtari i asamblesë.
