Shtetet e Bashkuara të Amerikës do të çojnë forcat e tyre speciale në Siri, për të asistuar rebelët antiqeveritarë në luftën kundër ISIS. Zyrtarët kanë thënë se do të jenë më pak se 50 forca speciale që do të shkojnë në Siri, për “të trajnuar, këshilluar dhe asistuar” forcat e opozitës.
Kjo është dhe hera e parë që trupat amerikane do të punojnë hapur në terrenin sirian. Një zyrtar i lartë i administratës në SHBA i tha medias britanike BBC se ky operacion nuk zinjalizon asnjë ndryshim të strategjisë së SHBA-ve kundrejt Sirisë, por një “intensifikim” të fushatës së saj kundër ISIS.
Për më shumë se një vit, SHBA dhe forcat e koalicionit kanë kryer fushata të bombardimi kundrejt ISIS, e cila kontrollon një pjesë të madhe të veriut të shtetit Sirian si dhe disa pjesë të Irakut.
Kohët e fundit SHBA kishte braktisur planin e saj për të trajnuar rebelët sirianë, duke u munduar që në vend të kësaj ti furnizonte me bazë materiale dhe armë drejtpërsëdrejti liderëve rebelë.
Aktualisht, për situatën në Siri po zhvillohet një tryezë bisedimesh në Vjenë, ku për herë të parë po merr pjesë edhe Irani, aleat i Sirisë. Takimi synon zvogëlimin e dallimeve mes Shteteve të Bashkuara dhe aleatëve të tyre dhe atij të aleatëve të Damaskut, që janë Rusia dhe Irani. Për momentin flitet për një përplasje mes palëve sa i takon të ardhmes së presidentit Bashar al Assad.