Në Shqipëri rastet e dhunës në familje ndaj grave janë tashmë një fenomen masiv, por po aq të shpeshta janë edhe rastet kur viktima të dhunës janë burrat. I tillë është rasti i një shtetasi nga Tirana i cili është dhunuar dhe rrëzuar nga shkallët nga bashkëshortja e tij. Gjithçka ka nisur për kujdestarinë e djalit të çiftit në proces divorci.
Kur shtetasi G.K. shkoi në banesën e vjehrrit të tij, u konfliktua me bashkëshorten E.K që ishte larguar nga banesa dhe priste nisjen e procesit të divorcit. Ai kërkonte të merrte djalin, por gruaja reagoi ashpër duke e shtyrë dhe duke e rrëzuar atë nga shkallët. Por, konflikti nuk mbaroi me kaq, burri i’u kundërvu dhe goditi disa herë me grushte gruan. Pas ngjarjes, burri denoncoi dhunën e gruas në polici. Të njëjtën gjë bëri edhe shtetasja E.K. Në përfundim të procesit gjyqësor, të dy bashkëshortët u dënuan me nga 3 muaj heqje lirie me kusht për secilin.
Si ndodhi ngjarja
Në datën 04.06.2015 rreth orës 18 :00 shtetasi G. K. është goditur nga bashkëshortja e tij duke rënë më pas nga shkallët pas goditjes. Edhe shtetasi G. K. nga ana e tij ka ushtruar dhunë ndaj bashkëshortes duke e goditur atë me grusht në fytyrë. Pas incidentit G. K. ka njoftuar nëpërmjet 129 se bashkëshortja e tij shtetesja E. K. ka ushtruar dhunë ndaj tij. Më pas si shtetasit G. K. ashtu edhe E. K. kanë bërë kallëzim penal ndaj njëri-tjetrit në Komisariatin e Policisë nr.3 Tiranë. I është marrë kallëzim shtetasit G. K. i cili sqaron se në datën 04.06.2015 ai ka shkuar te shtëpia e bashkëshortes së tij E. për të çuar djalin e vogël, pasi është në proces divorci dhe nuk jeton më me bashkëshorten.
Në momentin që kam lënë djalin filluam duke biseduar për seacën gjyqësore për ndarjen. Gjatë bisedës po diskutonim për fakte dhe prova që unë disponoj kundrejt saj të cilat i kam në telefon. Në këtë moment E. donte të më merrte telefonin për të fshirë provat që unë kam. Më ka shtyrë nga shkallët dhe unë jam rrëzuar pasi jam me paterica. Kam pësuar një aksident të rëndë dhe kam shumë dëmtime në trup. Kam kërkuar ndihmë, por askush s’më ka ndihmuar, E. është afruar dhe më ka gërvishtur në qafë, për tu vetëmbrojtur i kam gjuajtur me një shuplakë në fytyrë.
I është marrë kallëzimi penal shtetases E. K., e cila sqaron se në datën 04.06.2015 ka takuar shtetasin G. K. i cili solli djalin në banesën time. Gjatë kësaj kohe kemi filluar të debatojmë në lidhje me kujdestarinë e djalit dhe gjatë këtij debati shtetasi G. K. më ka goditur më grusht në fytyrë. Menjëherë jam futur brenda në banesë. Mbas disa minutash është bërë shoqërimi për në ambjentet e komisariatit të policisë./Javanews/a.m.
