Të paktën persë persona janë plagosur këtë të premte në Tel Aviv të Izraelit, si pasojë e sulmeve iraniane me raketa balistike.
Përfaqësuesi i shërbimit kombëtar të urgjencës së Izraelit, Magen David Adom, tha se pesë persona janë plagosur në zonën metropolitane të Tel Avivit dhe po dërgohen në spital, raporton BBC.
Ai tha se njëri prej të plagosurve është në një “gjendje të rëndë” ndërsa katër të tjerët janë “plagosur lehtë”.
Pas deklaratës së ushtrisë izraelite, e cila tha se sulmoi centralin bërthamor të Iranit në Isfahan, Irani nga ana e tij lëshoi sot raketa ndaj Izraelit.
Për rrjedhojë, Izraeli i bëri thirrje qytetarëve që të qendrojnë në strehimore deri në një njoftim të dytë.
Izraeli tha më herët se shkatërroi infrastrukturën bërthamore në Isfahan.
Avionët e Forcave Ajrore sulmuan vendin bërthamor, ku zhvillohet procesi i rikonvertimit të uraniumit të pasuruar, sipas Forcave të Mbrojtjes Izraelite (IDF), raporton BBC.
IDF tha se ka “shkatërruar një strukturë për prodhimin e uraniumit metalik, infrastrukturën për konvertimin e uraniumit të pasuruar, laboratorët dhe infrastrukturën shtesë”.
Ndërkohë udhëheqësi iranian paralajmëroi për veprime të ashpra kundër Izraelit.
