Shërbimi i rojes kufitare të Ukrainës ka konfirmuar se mercenarët e grupit Wagner kanë mbërritur në Bjellorusi, duke bërë kalimin nga Rusia fqinje.
DPSU thotë se po vlerëson se sa ushtarë ndodhen tashmë në Bjellorusi, si dhe po punohet për gjetjen e vendndodhjes së tyre të saktë.
Ndërkohë, imazhe që supozohet se tregojnë luftëtarët e Wagner duke trajnuar ushtarë bjellorusë në një bazë në juglindje të Minskut janë shfaqur po ashtu në rrjet.
Autoritetet bjelloruse, të cilat e konsiderojnë “Belaruski Hajun” si një kanal ekstremist, nuk e kanë komentuar këtë çështje.
Lëvizja e forcave të Wagner vjen pas takimit të shumëpërfolur me Vladimir Putin, 5 ditë pas rebelimit të Yevgeny Prigozhin në qershor.
Udhëheqësit të Wagner, Yevgeny Prigozhin, iu ofrua gjithashtu një transferim në Bjellorusi, por vendndodhja e tij aktuale mbetet e paqartë.
Në fillim të kësaj jave, Presidenti Putin zbuloi se Prigozhin kishte refuzuar një ofertë që luftëtarët e tij t’i bashkoheshin ushtrisë ruse si njësi e rregullt. Sipas Putin, përgjigja e Prigozhin ishte “djemtë e Wagner nuk pajtohen me këtë vendim“.
Ai i tha gazetës ruse Kommersant se shumë komandantë grupesh kishin mbështetur planin, që do të udhëhiqej nga një figurë e lartë e Wagnerit, gjatë bisedimeve në Moskë më 29 qershor.
Putin tha gjithashtu se sipas ligjit rus, Wagner “nuk ekziston”, sepse grupet mercenare nuk njihen zyrtarisht.
