Me rastin e njëvjetorit të jetëndërrimit të Kryepiskopit të lumur Anastas, nën kujdesin e Fortlumturisë së Tij Joan, Kryepiskop i Tiranës, Durrësit dhe Gjithë Shqipërisë, u organizua një Konferencë Ndërkombëtare me temë: “Kryepiskopi Anastas, madhështia në të bërët dhe në të mësuarit”.
Konferenca mbledh personalitete të fushës teologjike, akademike dhe kishtare, për të reflektuar mbi jetën, veprën dhe trashëgiminë shpirtërore të një prej figurave më të shquara të Kishës Orthodhokse bashkëkohore.
Fortlumturia e Tij, Kryepiskopi Joan theksoi se Kryepiskopi Anastas ishte një personalitet unik, i cili përmes jetës dhe veprës së tij forcoi besimin e palëkundur te Perëndia.
“Nëpërmjet shembullit të tij, Kryepiskopi Anastas e ka forcuar tek të gjithë ne besimin e patundur tek Perëndia. Është bërë tashmë proverbiale thënia e tij: ‘Perëndia nuk do të na braktisë’,” u shpreh Kryepiskopi Joan.
Ai shtoi se jeta dhe vepra e Kryepiskopit të lumur Anastas mbeten një shembull i gjallë dhe një frymëzim i vazhdueshëm, jo vetëm për brezin e sotëm, por edhe për brezat që do të vijnë.
Duke cituar vetë Kryepiskopin Anastas mbi vizionin e tij për Orthodhoksinë, Kryepiskopi Joan theksoi rëndësinë e hapjes ndaj zhvillimeve bashkëkohore.
“Kur e mendoj Orthodhoksinë në shekujt që vijnë, e ëndërroj të hapur ndaj zhvillimit, ndaj kushteve të reja të krijuara nga shkenca, arti dhe teknologjia. Vendi i Orthodhoksisë nuk është jashtë historisë, por në qendrën e brumosjeve sociale, në pararojë të progresit”, tha Kryepiskopi Joan.
Kryepiskopi Joan u shpreh se nderimi i figurës së tij nuk duhet të mbetet vetëm në admirimin e veprës, por në ndjekjen aktive të misionit të tij shpirtëror.
“Duke ndihmuar dhe shpëtuar të tjerët, shpëtojmë edhe veten tonë. Ky ishte thelbi i dhiakonisë që ai jetoi gjatë gjithë jetës së tij”, tha Kryepiskopi Joan.
Gjatë fjalës së tij, Kryepiskopi Joan vlerësoi kontributin e jashtëzakonshëm të Kryepiskopit Anastas në misionin kishtar, veçanërisht shërbimin e tij dhjetëvjeçar në Afrikë, ku u ndërtuan kisha, shkolla, klinika mjekësore dhe u themelua i vetmi fakultet orthodhoks në kontinentin afrikan.
Ai theksoi se koncepti i dhiakonisë tek Kryepiskopi Anastas e tejkalonte kuptimin tradicional, duke u mbështetur në vetë fjalën e Krishtit, i cili erdhi “jo për t’u shërbyer, por për të shërbyer”.
Punimet e Konferencës Ndërkombëtare do të zhvillohen nga 22 deri më 24 janar 2026. Më 25 janar 2026, në Katedralen “Ngjallja e Krishtit” në Tiranë, do të zhvillohen Mëngjesorja dhe Liturgjia Hyjnore (ora 07:30 – 10:30), nën drejtimin e Fortlumturisë së Tij, Kryepiskopit Joan, së bashku me anëtarët e Sinodit të Shenjtë të Kishës Orthodhokse Autoqefale të Shqipërisë;
Shërbesa e Përshpirtjes (ora 10:30), në përkujtim të Kryepiskopit të lumur Anastas, me pjesëmarrjen e besimtarëve dhe të ftuarve.
