“Derisa unë të jem president, Serbia nuk do ta njohë pavarësinë e Kosovës dhe do të jetë ushtarakisht neutrale”.
Kjo ishte deklarata e fortë që Presidenti serb Aleksandër Vuçiç bëri nga Zyrihu, vetëm pak orë pas një takimi me shefen e re të Bashkimit Europian për politikën e jashtme në Bruksel, Kaja Kallas.
Duke komentuar një “non-pejper“ të cilën e ka shfaqur gazeta “Slobodna Bosna”, ku thuhej se në pranverë apo deri në verë të vitit të ardhshëm do të mbahet konferenca për vendet ballkanike në të cilën Serbia dhe Kosova detyrohen të njohin njëra-tjetrën si dhe ku do të prezantohet kandidatura e përbashkët me Bosnjën dhe Hercegovinën për tu anëtarësuar në NATO, Vuçiç tha se “nuk është problem që dakordësohen, por janë edhe tre karta shtesë”.
“Derisa unë të jem president, Serbia nuk do t’a njohë pavarësinë e Kosovës. Deri sa unë të jem president, Serbia do të jetë ushtarakisht neutrale dhe president i Serbisë do të jem edhe për 2 vite e disa muaj. Gjatë kësaj kohe ato konferencat botërore, të botës së bardhë dhe çuditë e tjera, le t’ia varin ‘maces tek bishti’”, tha Vuçiç.
Me rastin e lajmit se ambasadorët e shteteve anëtare të BE sot nuk arritën marrëveshje rreth çeljes së kapitullit të tretë për Serbinë në negociatat me Bashkimin Europian, Vuçiç tha se ngelet që rreth kësaj teme të bisedohet në javët e ardhshme.
Ai zbuloi se kundër kanë qenë vendet balltike, Finlanda, Suedia, Holanda, por edhe Kroacia dhe Bullgaria.
“Të shikojmë, kemi edhe shtatë ditë. Nëse duan – duan, nëse nuk duan – nuk duan, u faleminderit”, shtoi Vuçiç.
Ndërkohë, “kërkesat” nga opozita që Vojvodina të jetë e pavarur, Vuçiçi i vlerësoi si “ide të çmendura dhe të pakuptimta”.
“E di që ata kanë ëndrra të ndryshme, por prej tyre nuk ka asgjë. Vojvodina është pjesë e Serbisë dhe jo vetëm që askush nuk dëshiron atë që do, por Vojvodina është e lidhur fort me Serbinë. Veriu i Serbisë është i lidhur fort me gjithë atdheun e tij. Është qesharake për mua për të komentuar këtë”, theksoi ai.
/a.r
