Raportuesi i Shqipërisë në Parlamentin Europian Knut Fleckenstein tha se rruga drejt familjes Europiane do të vijojë në hapat e saj nëse Shqipëria kryen reformën në drejtësi, si pika fokale e “detyrave” kyce për hapjen e negociatave të vendit me BE.
Këtë të premte në ambientet e kryesisë së kuvendit u zhvillua një konferenca e 11 e komisioneve parlamentare të Integrimit në Europën Jug Lindore në lidhje me sfidat e rajonit drejt BE.
Fleckenstein ritheksoi edhe njëherë rëndësinë e reformimit të gjyqësorit dhe luftën kundër korrupsionit.
“Reforma në gjyqësor është shumë e rëndësishme pasi do të ndihmojë në luftën kundër korrupsionit…. Shteti i së drejtës dhe funksionimi i institucioneve gjyqësore do të ndihmojë në anëtarësim”, theksoi Fleckenstein.
Kreu i Kuvendit Ilir Meta theksoi punën dhe sfidat që ka Shqipëria por edhe rajoni në rrugën drejt Bashkimit Europian. Meta tha se reforma kyçe për të qenë më pranë Bashkimit Europian është dhe mbetet ajo në Drejtësi.
“Duhet të përgatitemi së bashku për konferencën e Parisit e cila duhet të cojë përpara projektet tona të poërbashkëta… ne e shohim perspektivën tonë të lidhur ngushtë me BE dhe vijimin e reformave kyce… Korrupsioni dhe krimi i iroganizuar ende qëndrojnë si barriera për të pasur mirëqeverisje në vendin tonë” – tha në fjalën e tij Kryetari Kuvendit.
Ndërkohë që kryetarja e Komisionit të Integrimit, demokratja Majlinda Bregu ka qenë kritike ndaj punës së qeverisë shqiptare, duke thënë se vendi ka sot numrin më të madh të azilkërkuesve në Ballkanin Perëndimor si dhe se papunësia e korrupsioni mbeten probleme akute.
“Sundimi pa kushte i ligjit është tipari kryesor i dokumentit të identitetit Europian, mbi ligjin nuk sunndon dot askush…Ne besojmë se parlamentet e vendeve të Ballkanit Perëndimor duhet të bashkëpunojnë. Integrimi është qasja e duhur, të investojmë më shumë besim tek kjo qasje. Të gjithë jemi dakord që procesi duhet të mbahet gjallë, ta riaktivizojmë atë. Zgjerimi është proces dhe jo ngjarje, ka nevojë për një vendimmarrje të qartë politike. Europianët të jenë të drejtë me ne”- tha Majlinda Bregu.
