Pas vdekjes së Papa Françeskut ka pasur një reagim edhe nga Konferenca Ipeshkvnore e Shqipërisë. Zëdhënësi i Kishës Katolike, Dom Mark Pashkja, tha se Papa iku duke na bekuar.
“Sapo na erdhi lajmi i kalimit në amshim të Atit të Shenjtë, Papa Françeskut, i cili u kthye në Shtëpinë e Atit sot rreth orës 07:35 të mëngjesit mendjet dhe zemrat tona iu drejtuan Hyjit të gjithëpushtetshëm me lutje për shpirtin e tij. Na bien në mend muajt e fundit të vuajtjes së tij shëndetësore, në të njëjtën kohë, këmbëngulja e tij për të qëndruar pranë popullit të tij si bari i mirë deri në fund edhe përgjatë këtyre ditëve të Pashkës. Ditën e Pashkës, dje, deshi vetë personalisht që ai ta jepte bekimin “Urbi et Orbi”, si testament i tij i fundit. Ati i Shenjtë Papa Françesku iku duke na bekuar”, tha Pashkja.
Zëdhënësi i Kishës Katolike tha se Papa Françesku e udhëhoqi kishën në këto vite nëpërmjet një dëshire të thellë ndryshimesh dhe reformash.
“Ai ngriti vazhdimisht zërin kundër luftës, armatimeve dhe shkatërimit të krijimit. Me fjalë dhe me vepra e udhëhoqi Kishën Katolike drejt një trajte më të përulur, më të thjeshtë. Ne i jemi mirënjohës Hyjit që na e dha Papa Françeskun në këto vite dhe i lutemi Hyjit që ta pranojë në banesën e amshume të mbretërisë së tij. Si ipeshkvinj të Kishës Katolike në Shqipëri falenderojmë të gjithë ata që në këto momente na gjenden pranë në mënyra dhe forma të ndryshme. I bëjmë thirrje të gjitha komuniteteve dioqizane, famullitare, rregulltare e çdo besimtari që të luten për Papa Françeskun. Po ashtu duke filluar nga mbrëmja e ditës së sotme të organizohen momente lutjeje dhe përshpirtërie me të gjitha komunitetet e besimtarëve dhe kambanat do të bijnë në shenjë zie, duke filluar nga momenti i marrjes së kësaj letre. Krishti e pastë në parrizë Papa Françeskun, e i dhëntë dritën e amshume”, tha Dom Mark Pashkja, zëdhënës i Kishës Katolike.
