Nënkryetarja e Kuvendit të Shqipërisë, Vasilika Hysi mori pjesë në ceremoninë e zhvilluar me rastin e 76-vjetorit të Konferencës së Pezës. Ajo zhvilloi homazhe në varrezat e dëshmorëve në Pezë dhe para memorialit të patriotit, Myslym Peza si dhe vendosi një kurorë me lule.
“Peza është pa asnjë dyshim vendi më i përshtatshëm dhe më i bukur për të revokuar e kremtuar Luftën Antifashiste Nacional-Çlirimtare. Dëshiroj gjithashtu të shpreh mirënjohjen e të gjithë shqiptarëve për luftëtarët e lirisë, që këtu në Pezë ndërtuan themelet e unitetit e të bashkimit të shqiptarëve “Pa dallim klase, feje, krahine dhe ideje”, duke u mbështetur në devizën e rilindasve “Feja e shqiptarit është shqiptaria”, theksoi nënkryetarja e Kuvendit, Vasilika Hysi.
“Ky emër, ky fshat, kjo shtëpi që kemi përballë dhe mbi të gjitha njerëzit e saj, na ngjallin të gjithëve emocione dhe na krijojnë të gjithëve frymëzim. Na motivojnë të gjithëve për ta dashur më shumë Shqipërinë, për të punuar më shumë bashkërisht. Peza na frymëzon për të bërë punë edhe më të mira për Shqipërinë”, tha Hysi.
Por, nënvizoi ajo, “Peza na qorton kur interesat politike i vendosim përmbi interesin kombëtar”.
Dhe interesi ynë më i madh kombëtar në ditët e sotme, theksoi Hysi, është ta bëjmë Shqipërinë politikisht dhe juridikisht ashtu siç është në frymën dhe shpirtin e çdo shqiptari: Një Shqipëri europiane, anëtare të Bashkimit Europian, familjes më të madhe demokratike të botës së sotme, me mbi gjysmë miliardë banorë, të kësaj familjeje, e cila bashkë me Shtetet e Bashkuara të Amerikës përbëjnë dy pjesët më të zhvilluara, më të ndriçuara dhe më të begata të qytetërimit perëndimor”.
“Por përparimi i Shqipërisë është i mundshëm dhe i arritshëm vetëm nëse bëhemi bashkë për të çuar deri në fund reformat e thella që kërkojnë nevojat e zhvillimit, por edhe partnerët tanë ndërkombëtarë”, tha ajo. /b.d
